KULBAHINAM ug makutas nga kadaugan ang nakulit sa Team Petracorta sa ilang pagbuntog sa Team Canillas, 89-87, pinaagi sa overtime aron sakmiton ang kampiyunato sa Cebu Aduana Basketball Legend (CABL) sa bag-o lang natapos nga Cebu Port Authority (CPA) gym sa Pier 6, dakbayan sa Sugbo.
Human matabla, 78-78, sa regulation period, ang Team Canillas daw og nagsubay na sa dalan paingon sa kadaugan human kini makaposte og singko puntos nga labaw sa nahabiling usa ka minuto sa duwa.
Apan ang tres sa team owner nga si Limasawa Island Mayor Melchor Petracorta, nga gisundan sa dos ni Ralp Salinas maoy nagtabla, 87-87, sa hinapos nga bahin sa overtime.
Misugod sa pag-amag ang kadaugan sa Petracorta sa dihang nasipyat ang Canillas sa katapusang kuwatro segundos.
Ning higayona, nakuha ni Francis Palero ang bola ug dinali kini nga gipasa ngadto ni Toni Largosa alang sa bayanihong layup nga nadungan usab sa pagkapupos sa oras ug maoy naghingpit sa selebrasyon.
Gawas kang Palero, nga maoy nahimong most valuable player (MVP) sa torneyo, maayo usab nga nakaayuda kaniya sa opensa sa Petracorta sila si Reyden Villaronza, Petracorta, Largosa ug Renato Agustinez. (JBM)