DIGOS CITY -- Padayon pang giimbestigahan sa kapulisan kung unsa ang motibo ug kinsa ang namusil patay sa usa ka Egyptian national nga tag-iya og bar sa dakbayan, ala 1:20 sa kaadlawon niadtong Lunes, Agosto 19.
Nahiagom og mga samad pinusilan sa nagkadaiyang bahin sa lawas si Haitian Ramadan Hamed Abdelrady, 31, tag-iya sa videoke bar sa lugar ug molupyo sa Barangay Zone 1.
Gibutyag ni Police Staff Sergeant Earl Cryz Guarino, imbestigador sa kaso, nga nahitabo ang insidente samtang pauli sa ilang balay ang biktima kuyog ang iyang kapuyo nga nagsakay og motorsiklo.
Sa inisyal nga imbestigasyon sa kapulisan, nasayran nga duha ka mga suspek nga nagsakay og motorsiklo diin ang angkas niini maoy nagpusil sa biktima paghidangat sa dalang Jumao-as sa Barangay Zone 1.
Nagkatibulaag og panagan ang mga biktima aron maluwas ang ilang kaugalingon, apan usa sa mga suspek migukod kang Abdelrady ug gipusil sud sa tulo ka higayon tumong sa nagkadaiyang bahin sa lawas hinungdan sa iyang hinanaling kamatayon.
Hinuon, wa maunsa ang kapuyo sa biktima nga paspas nakadagan palayo sa lugar.
Di pa masulti sa kapulisan kon unsa ang armas nga gigamit sa mga suspek human pakyas ang mga sakop sa Scene of the Crime Operatives sa pag-rekober og mga basiyong bala sa armas didto sa crime scene.
Gisubay na sa kapulisan kinsa ang suspek sa krimen.
Nasayran nga mipasaka si Abdelrady og kasong pagpangawat batok sa usa sa iyang sinaligan sa videokehan dihang nahanaw ang matud pa P60,000 duha ka semana ang milabay.