NASUGAMAK sa dakong kapildihan ang Cebu Sharks batok sa overall leader San Juan Knights, 88-69, niadtong Lunes sa gabii, Agusto 19 sa Maharlika Pilipinas Basketball League (MPBL) Lakan Season sa Cuneta Astrodome sa Pasay City.
Sa kadaugan, napahugtan sa Knights ang ilang paggunit sa solong liderato bitbit ang 10-0 nga rekord samtang ang Sharks nangatagak sa 4-6 nga rekord.
Ang Sharks ni coach Titing Manalili nakasukol pa’g insakto sa sayong bahin ug naglabaw pa kini, 19-18, human sa 1st quarter.
Apan pagsugod sa 2nd quarter, kalit lang mingbulhot ang opensa sa Knights ug ningmugna kini’g 13-0 run nga naghatag kanila og 31-19 nga labaw.
Ang jumpshot ni Edrian Lao maoy nakapukaw sa nahinanok nga opensa sa Sharks nga maoy nagpahak sa bintaha sa Knights, 31-21.
Padayon nga ninglangoy ang opensa sa Sharks hangtod nga nakasikit sila pagbalik, 33-37.
Sa 3rd quarter, gipahugtan sa Knights ang ilang depensa nga maoy nakapabulhot og balik sa ilang opensa aron inaton pagbalik ang ilang bintaha sa dobleng numero nga puntos, 64-50.
Human niini, wala na nakabangon ang Sharks hangtod na sa katapusang gutlo.
Ang Knights gipangulohan sa ilang duha ka kanhing mga magduduwa sa Philippine Basketball Association (PBA) nga sila si John Wilson ug Mark Cardona.
Nagpakatap og 23 puntos si Wilson alang sa Knights samtang nidugang og 16 puntos si Cardona.
Ang Sharks gipangulohan ni Lao pinaagi sa iyang 14 puntos. (ESL)