NATAWO sa kawad-on si Marco. Ang iyang inahan labandera samtang ang iyang amahan usa ka basurero. Nasakit ang iyang amahan sa kanunayng pakig-asdang sa init ug ulan sa iyang pagpamunit og basura. Kay way kuwarta sa pagpatambal namatay kini.
Di na mapugngan ang iyang hukom. Nananghid siya sa iyang magtutudlo. Sa hagdanan sa La Puerta Elementary School naapsan siya sa gisugo sa iyang magtutudlo nga si Mr. Ronald Gomez. Unsa kahay tuyo niini?
“Ayaw lang pag-undang, Marco. Akoy mogasto nimo hangtod kolehiyo. Gawas pa, anugon kaayo kay brayt ka nga tinun-an.”
Nakahinuktok siya makadiyot. “Salamat, Sir, akong dawaton imong tanyag.”
Wa moluag si Mr. Gomez sa iyang pagtabang sa pamilya ni Marco hangtod ang manghod nga si Nena gitabangan niya nga makatungha.
“Sir, may adlaw ra nga ako makabawos nimo. Sugoa ko bisan unsa akong tumanon.’
“Ayaw na hunahunaa, Marco, atubanga ang imong pagtuon.
Nakatapos si Marco sa kolehiyo nga honor graduate. Nalipay kaayo si Mama niya Floring. Sa bantawan sa iyang pagkanaog gigakos siya ni Mr. Gomez. “Congrats, Marco, usa na ikaw ka professional.”
Nadawat siya sa Mindanao Steel isip accountant human mopasar sa Certified Public Accountant board exams. Gida niya ang iyang pamilya. Nahimong chief accountant siya sa pipila ka tuig. Tungod sa iyang high-caliber performance gi-promote siya isip general manager. Usa ka adlaw mi-telepono kaniya si Mr. Gomez. Mibakasyon si Marco segun sa hangyo ni Mr. Gomez.
Sa unang higayon iyang nahibaw-an ang negusyo ni Mr. Gomez. Plantalya lang diay ang iyang teaching job sa tulonghaang publiko. Giyagyag niini ang iyang mga koneksiyon sa mga dagko sa kagamhanan ug militar labaw sa tanan sa iyang mga pabrika sa shabu sa nasod.
“Gipahibawo ti ka niini kay maoy akong plano nga ikaw ang padad-on ko sa akong negusyo sa drugas, salig ko nimo, Marco.”
Mikuba ang dughan ni Marco sa iyang nadungog. “Apan sa di pa ning tanan, patya una si Major Alex Tukmo, ang kanhi mong kauban sa high school kay tunok sa akong negusyo, ikaw ang mohimo ini, ayaw isalig og lain.”
Mitutok si Marco kang Mr. Gomez.
“Makabawos na unya ka kanako,” matod ni Mr. Gomez nga mipahiyom.
USA ka gabii nga naghunahuna si Marco sa ipabuhat ni Mr. Gomez kaniya. Nakahukom siya nga makig-estorya kang Major Tukmo.
Pagka sunod buntag sa ayroplano padung Mindanao, nabasa ni Marco ang nagbansiwag nga banner story sa Super B. “Banggiitang druglord nasikop patay sa kapulisan.” (KATAPUSAN)