ORMOC City, Leyte -- Hamtong nga lalake nga nitahan kanhi sa Oplan Tokhang nasikop sa kapulisan sa Dakbayan sa Ormoc gumikan sa pagbaligya og ilegal nga drugas.
Si Police Leiutenent Romeo Labata, niila sa suspek nga si Juvy Guljuran, 51, taga District 4, Mabini St., Ormoc City.
Dugang ni Labata, usa ka job order employee sa Kagamhanan sa Dakbayan sa Ormoc si Guljuran.
Matod sa inahan sa suspek, unom na ka tuig nga nagtrabaho sa kagamhanan ang iyang anak.
Human sa pagtahan sa tokhang, gipaubos pa kini sa rehabilitation program sa Siyudad.
Apan usa ka kasaligang tinubdan sa Ormoc City Drug Enforcement Unit nisugilon nga duna silay nadakpan nga gitudlo si Guljuran nga ilang kuhaan.
Niini, ilang gipaubos sa surveillance si Guljuran.
Pasado alas 7 sa buntag, Lunes, Agusto 19, 2019, gilusad sa kapulisan ang buy bust operation atbang sa New Ormoc City National High School.
Napalitan og usa ka pakete sa gituhoang shabu si Guljuran hinungdan nga gipalibutan kini sa mga operatiba.
Samtang gipaabot ang opisyal sa barangay, gipa-snack pa sa kapulisan ang suspek.
Sa pagkapkap kaniya, laing tulo ka pakete sa gituhoang shabu ang nakuha sa mga pulis gikan sa pitaka.
Si Guljuran nihimakak nga iya ang nakuha nga shabu.
Si Mayor Richard Gomez nibahad nga wa siyay pilion sa kampanya batok ilegal nga drugas, kaalyado man niya o kawani.
Gani, pipila na ka kawani ug kaalyado ang gisikop gikan sa paglingkod ni Gomez niadtong 2016. (JKDP)