Hustisya singgit sa pamilya sa kapitan

HILONGOS, Leyte -Hustisya ang singgit sa banay sa barangay kapitan nga gipusil patay sa nagpailang mga rebeldeng New People’s Army (NPA) sa miaging semana.

Ang banay ni San Antonio Barangay Kapitan Virgilio Loquias, 43, wa pa makadawat sa nahitabo kaniya.

Si Loquias gipusil patay sa upat ka mga lalakeng ningpaila nga mga NPA niadtong Huwebes, Agusto 15, 2019 sa may sityo Mahangin.

Ang maong lugar bukirang bahin ug maglisud pagsud ang mga sakyanan

Ang kasundalohan sa 802nd Infantry Brigade pinangulohan ni Brigadier General Lope Dagoy mikondenar sa brutal nga pagpatay sa kapitan.

Gisaad sa awtoridad nga di sila mohunong hangtod manubag ang mga responsable sa krimen. Ang asawa mismo ni Loquias ang nanawag sa kapulisan nga dunay pagpamusil sa maong lugar.

Sa pagtawag sa asawa, wa pa siya masayud nga iya diayng bana ang biktima sa pagpamusil.

Human masayod ang kapulisan, nakig-alayon sila sa kasundalohan sa pagresponde sa dapit gumikan kay kini gihugpaan sa mga NPA.

Mga alas 8 sa buntag sa buntag niadtong Huwebes, uban sa iyang ugangan ug laing kauban, nananghid si Loquias nga manguha og pasayan sa usa ka creek.

Samtang nagluto ug nangaon sila daplin sa sapa, upat ka armadong mga lalake ang kalit nga niabot ug gipusil sa makadaghang mga higayon ang kapitan.

Ang nagpailang mga NPA niingon pa sa mga kauban nga “Uli na mo kay wa moy labot. Dako ni sala kay mao ni nakapa-raid duol sa inyong barangay. Ingna ang nagpatay sa inyong kapitan, NPA”.

Alas 8 sa gabii na hingpit nga nakuha ang lawas sa kapitan gikan sa napatyan niini.

Gidala ang lawas sa Hilongos District Hospital para sa post mortem examination.

Wa na maproseso sa kapulisan ang crime scene gumikan kay NPA infested ang dapit.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph