MOABOT sa 530 ka mga tinun-an sa junior ug senior high school sa Pagsabongan National High School mipaubos sa usa ka symposium mahitungod sa pakigbatok sa ilegal nga drugas ug terorismo.
Napuno ang covered court sa Brgy. Pagsabongan sa Dakbayan sa Mandaue sa Martes, Agusto 20. Ang tanan nga mga tinun-an misalmot sa symposium nga gipanguluhan sa mga opisyal sa Anti Crime and Community Response Team (ACCERT) ubos sa kapulisan sa Dakbayan sa Mandaue.
Usa sa katuyuan sa kalihukan mao ang pagpasabot ug pagpugong sa kabataan sa pag-apil sa mga illegal nga kalihukan ingon man sa mga komunistang grupo. Gipasabot sa opisyal sa Accert, Bishop Joy Bendoy, nga kanunay na silang mipahigayon og drug symposium sa mga tunghaan.
Apan karon gihingusgan na nila ang pakigbatok sa mga walhong grupo tungod sa kadaot nga dala niini sa linaw unta nga kinabuhi sa kabataan nga duna usay mga pangandoy.
“Makita namo karong panahona kusog kaayo ang recruitment sa mga leftist sa mga students especially mga junior high ug senior high. Mao nang mas maayo nga i-educate nato sila unsa gyud ilang function and how the damaged they have done to our country,” matod ni Bendoy.
Mga batan-on ang target karon sa mga komunista hinungdan nga gisugdan usab nila ang symposium sa mga batan-on nga matod pa niya dali ra maagni sa mga grupo.
“Ang mga kabataan dali kaayo dad-on sa mga ingun ana nga mga idelohiya kay unsay buhaton nila, ipagawas nila ang mga negative sa government and they will say, “hey, mao ni gibuhat sa atong gobyerno. Kinahanglan pulihan nato”, matod ni Bendoy.
Sa kalihukan, may mga video ug short films nga gipakita ang sakop sa Accert nga magtabang sa mga batan-on nga makita ang mga gibuhat sa mga durugista ug mga komunista nga kadaot sa panglawas ug sa nasud.
Usa sa mga tinun-an, ang grade 10 student nga si Johannie Debalucos miawhag sa mga batan-on nga di muapil sa mga grupo nga may illegal nga gibuhat ilabi na ang magpa recruit sa mga terorista.
“Dili gyud ta moduol anang mga naay kuan sa illegal drugs ug sa kanang mga tawo nga terorista kay makaguba man sa atong future”, matod ni Debalucos.
Nagtinguha karon ang kapulisan kauban ang Accert nga maoy nangulo sa kalihukan nga sa hinay-hinay nga paagi, masumpo ug malikay niini ang mga inosente sa kadaot nga dala sa mga grupo. (ANV)