LALAKENG gituohang biktima sa salvage ang napalgan sa Purok Shooting Star, Barangay Babag dakbayan sa Lapu-Lapu pasado 6:00 am, kagahapon, Agosto 20.
Samtang ulo sa gituohang drug pusher nabungkag human gipusil sa wa mailhing mamumuno niadtong Lunes, Agosto 19 sa gabii sa Barangay Poog, dakbayan sa Toledo.
Ang gipatay sa Babag, Lapu-Lapu nailhan nga si Nelson Rosani, 46 nga taga-Barangay Catarman, Cordova nga nakaangkon og samad pinusilan sa ulo ug duha sa iyang mga bukton.
Napalgan ang biktima kilid sa dalan nga sagad agi-an ra usab sa mga molopyo hinungdan nga kini nakit-an.
Positibo kining giila sa iyang asawa nga si Rema kinsa dali nga miadto sa dapit sa dihang nasayod sa tawo nga napalgang patay.
Matod ni Police Staff Sergeant Dan Gacoscosim, imbestigador sa Police Station 3 sa Lapu-Lapu City Police Office base sa gibutyag sa misis nga ang biktima gi-pick up sa wa mailhang mga lalake diha sa ilang panimalay nga nakapahibulong sa asawa.
Giingong tulo ka mga lalake nga armado ug adunay dala nga pusas, nag-jacket ug naka-bonnet ang mipick-up sa biktima samtang natulog kini uban ang iyang asawa ug mga anak.
Tungod sa hitabo dali nga gipangita ni Rema ang iyang bana aron nga magpakisayod kon asa kini gidala.
Nakugang nalang ang asawa sa dihang napalgan nalang pagka-buntag nga patay na.
“Di pata ka disclosed nga salvage ni kay sa atong na-gather nga information igo raman siya napalgan didto nga ingon ato na ang kahimtang,” matod ni Gacoscosim.
Sa pagkakaron gisusi pa sa kapulisan ang record sa biktima sa lungsod sa Cordova sanglit sa area sa LCPO way record ang biktima.
Sigun pa sa asawa nga wala usab kiniy kasayuran kon nalambigit sa ilegal nga kalihukan ang iyang bana.
Samtang si Lapu-Lapu City Mayor Junard Chan mipahinumdum sa kapulisan nga sulbaron ang mga panghitabo pagpatay sa dakbayan ug dili angayang mabalaka ang publiko gumikan kay isolated case ra ang hitabo.
Sa laing bahin, giingong drug pusher sa Barangay Poog, Toledo City ang gipusil tumong sa ulo.
Gi-ila ang biktima nga si Mario Esquerra, 38, adunay kapuyo nga adunay tulo ka samad pinsulan diha sa iyang ulo.
Si Police Master Sgt. Rodney Libumfacel, sa Toledo Police Station nga nahinabi sa Superbalita Cebu nagkanayon nga ang kapuyo sa biktima nga si Susan, mibutyag nga dunay wa mailhing tawo nga gika-istorya si Mario diha sa gawas sa ilang panimalay.
Paglabay sa pipila ka minutos kalit lang niyang nabati ang sunod-sunod nga sipang buto sa armas. Sa pagsusi niya sa gawas naglunang na sa kauaglingon dugo ang biktima nga dunay samad pinsulan sa ulo.
Matod pa ni P/MSgt. Libumfacel nga drugas ang motibo sa kremin ang ilang gisubay sanglit naila nga pusher ang biktima sa ilang lugar.
Ang inahan niini mibutyag sa kapulisan nga makadaghang higayon na nga gibadlong niya iyang anak apan wa mopatuo. (GCM, GPL)