MENOR de edad nga nagbaguod sa pag-alsa sa P13,000 nga sensiyo nga gisud og sako nga iyang gikawat ang nadakpan sa kapulisan.
Ang pagkasikop sa maong batan-on nahitabo kagahapon, Agosto 20 sa kadlawon didto sa New Public Market sa Barangay Gairan, dakbayan sa Bogo.
Si JM (di tinuod nga pangalan), 14, nga taga Barangay Banban, dakbayan sa Bogo nasikop sa mga sakop sa beat patrol police nga nag-roving.
Ang suspek milungkab sa Merly Store nga gipanag-iya ni Merly Bartender, 47, taga Brgy. Nailon, Bogo.
Si P/Supt. Emelie Santos, hepe sa Bogo Police Station nga naaktuhan sa iyang mga sakop sa beat patrol nga migawas sa tindahan. Nagdala og sako hinungdan nga ilang gisita.
Nasurpresa ang mga pulis kay sako nga adunay sulod nga mga sinselyo nga mokantidad og P13,600.
Sa imbestigasyon nasuta nga ang menor de edad nakasulod human ang ang kahoy nga bongbong sa tindahan giligwatan sa screw driver.
Gawas niini, ang linya sa CCTV cam iyang giputol.
Ang minor de edad gi-refer na sa kapulisan sa City Social Welfare and Development Office CSWD.