MOABOT ngadto sa 700 kilos nga nagkadaiyang klase sa isda nga pinabuthan gikan sa Zamboanga ang nasakmit sa Cebu City Bantay Dagat Commission (CCBDC) ug Maritime Police atol sa ilang gipahigayon nga market denial niadtong Agusto 20 sa kadlawon.
Si Ariel Yburan, executive director sa CCBDC nagkanayon nga gikarga sa usa ka Isuzu truck nga adunay plate number JCU 2191 nga adunay 3,880 kilos nga isdang Mamsa, Molmol, Rumpi ug Inggatan.
Si Yburan nagkanayon nihimo og operasyon ang ilang grupo sa dihang ilang nasigpatan ang maong truck ug base sa dokumento nga ilang nakuha, naggikan sa General Santos City ang maong mga isda apan dihang ilang gi-imbistigar, nasuta nga gikan sa Zamboanga ang maong isda.
Matod pa sa pangulo sa Bantay Dagat nga palusot kini sa shipper aron linglahon ang mga awtoridad sanglit ang GenSan naila sa ilang mga produkto nga Tuna.
Dihang gisusi sa ilang fish examiner nga si P03 Aristocles Ambus nasuta nga bungkag ug wala na mahitsura ang ilang mga internal organ nga maoy timailhan sa pinabuthang isda.
Sa wala pa maabot ang truck nga gimaneho ni Renedilo Maghanoy hingkod na ang panuigon ang gikustodiya sa Maritime Police, ug laing duha ka truck ang gi-flagdown sa barangay Pasil apan nagnegatibo ang ilang operasyon.
Ang 3,180 kilos nga isda nga dili pinabuthan gipangkuha sa mga tindera sa Pasil Fish Market samtang ang truck nga gisakyan ilang gi-impound isip kabahin sa ebidensya sa kasong ilang ipasaka batok sa driver, pahinante ug Fatma Fishing nga nakalapas sa Republic Act 10654 nga adunay penalty mga dili moubos sa P30,000.
Si Yburan nagkanayon nga kaduha na nila madakpi si Maghanoy kinsa niingon nga wala siya mahibawo nga adunay mga isda nga pinabuthan nga na-apil og karga sa sakyanan nga iyang gimaneho.
Si Yburan nagkanayon nga nagkantidad P280,000 ang maong mga isda sanglit moabot sa tag P400 ang kilo gumikan sa bati nga panahon.
Sukad paglingkod ni Yburan, niabot na og kapin o kulang P500,000 nga kantidad sa isda nga pinabuthan ang ilang nasakmit nga gipanghatag ngadto sa mga charitable institution sa dakbayan sa Sugbo. (PAC)