GAWAS sa P5 million nga financial assistance nga ipang-apod ngadto sa 80 ka mga barangay in Cebu City, si Mayor Edgardo Labella nipaneguro mga sa mga barangay kapitan, hatagan sila og laing P5 million kon ilang masustiner ang kalimpyo sa ilang dapit.
Human siya niluwat og direktiba ngadto sa mga barangay official nga hayan sila masuspenso kon di sila makapatuman sa mga balaud sa kalikupan, si Labella nisaad sa mao nga mga opisyal nga dunay maayong performance sa pagkolekta sa basura ug mapadayon ang kalimpyo sa sapa ug mga agianan sa tubig, nga sila makadawat og dugang pundo.
Ang mga barangay kapitan duna nay budget nga tag P5 million matag usa isip financial assistance gikan sa 2019 annual budget, matod ni Labella.
Si Labella nakabantay nga base sa mga project proposal nga giduso sa mga barangay kon unsay ilang gastuhan sa P5 million nga financial assistance, sagad kanila niingon nga ila kining gastuhon sa pagpalit og garbage trucks.
Ning higayuna, ang mga Barangay Sawang Calero ug Malubog pa ang nakadawat sa financial assistance, samtang ang 28 ka barangay naa na sa Office of the Mayor naghuwat sa pirma sa mayor.
Ang laing 18 ka mga barangay naa pa sa City Accounting Office naghuwat nga i-release.
Matod ni Labella nga kon ang mga barangay official makatuman sa gikinahanglang rekisitos, hatagan dayon sila sa nahisgutang pundo.
Mga barangay official gikinahanglan nga mo-submit og project proposal ngadto sa Association of Barangay Councils (ABC).
Ang ABC president modala niini ngadto sa City Council pinaagi sa usa ka resolution nga gitakdang dad-on ngadto sa Office of the Mayor alang sa pagtugot.
Kon pirmahan sa mayor ang proposal, i-forward gilayon kini sa accounting office alang sa pag-release sa budget.
Si Labella nipahibawo sa 80 ka mga barangay kapitan, sa ilang panagtagbo sa Martes sa buntag, Agusto 20, 2019, nga sa sunod nga budget, mohatag na usab siya og laing P5 million sa mga barangay nga dunay maayong evaluation.
Ang assessment pagahimuon sa komitiba nga gilangkuban sa special assistant to the ayor Jose Daluz III, Dr. Jeffrey Ibones ug City Treasurer’s head Jerone Castillo,
Ilang pagatan-awon ang husto ug maayong pagkolekta sa basura ug kamaayo sa performance sa barangay.
Sa iyang pagpamulong, si Labella niingon nga nasayod siya nga kuwang og mga gamit ang mga kapitan aron magpabilin ang kalimpyo sa mga barangay.
“Ang reklamo ngano’ng ang uban wa ka-implement (sa balaud) tungod kay kuwang ang garbage trucks. Sakto ko no?,” matod ni Labella.
Si Labella niingon nga ang pundo makatabang sa mga barangay sa pagpalit sa garbage trucks nga dugay na nilang gipangandoy.
Reklamo
Si Banilad Barangay Kapitan Dennes Tabar, sa interbyu sa Superbalita Cebu, niingon nga nakadayeg sila sa tinguha ni Labella.
Apan silang mga kapitan nga kaalyado sa Bando Osmeña Pundok Kauswagan (BOPK) nasagmuyo kay hangtod karon wa pa pirmahi sa mayor ang authority to serve. Ang authority to serve gikinahanglan aron mahatagan og allowance ang ilang garbage truck drivers ug loaders. (JJL, dugang taho ni REV)