CLAMPING ordinance sa Siyudad sa Talisay estrikto nga ipatuman na sulod ning semanaha.
Alang niadtong mo-park sa mga sidewalk o sa daplin sa dalan, ilabi na sa mga national highway sa Siyudad sa Talisay sulod ning semanaha, mas maayo nga mosunod na sa lagda nga di mo-park sa daplin sa dan.
Kay di pasayluon ug basin ikaw ang usa sa mga kinaunhan nga maklaman sa mga sakop sa City of Talisay Traffic Operations and Development Authority (CT-TODA).
Ang mga maklaman gikinahanglan nga mobayad og P1,000 ngadto sa ilang buhatan, una matangtang ang clamp.
Laing P500 alang sa kalapasan sa ilegal parking ug laing P500 alang sa kalapasan sa clamping ordinance.
Kon adunay pending nga mga kalapasan, pabayran usab una ang mga penalties niini.
Hinuon, matod ni Jonathan Tumulak, pangulo sa CT-TODA, nga hatagan una og higayon og lima ka minutos and driver pinaagi sa pag-pawangwang sa patrol car nga maoy nagdala sa mga clamp.
Ang CT-TODA adunay 15 ka mga clamp. Kon 24 oras nga mag-operate, matod ni Tumulak, kini usa angay nga atngan sa mga malapason.
Hangyo usab ni Tumulak sa mga kan-anan o uban pa nga mga commercial establishment nga motagana sila og parking area alang sa ilang mga kustomer ug dili lang gamiton nila ang sidewalk o daplin sa dan.
Kay pipila sa mga taxi ug jeep o mga pribadong’ sakyanan nabantayan nga tig-park daplin sa dalan aron sa pagkaon sa mga karenderya, restaurant o adunay paliton sa mga tindahan.
Giangkon ni Tumulak nga sa kapin usa ka buwan nga estrikto nga pagpatuman sa mga lagda sa trapiko, nakita sa CT-TODA nga adunay 10 ngadto sa 20 porsyento nga pagkunhod sa mga malapason nga mga driver.