SECTIONS
Saturday, September 21, 2019
SUPERBALITA CEBU

Nalambigit sa ‘scam’ gipatay

CEBU. Lalakeng gituohang gi-salvage sa Barangay Cansomoroy, Balamban nailhan na pinaagi sa mga ID card nga nakuha sa kapulisan sa SUV nga gisunog ug gihulog sa laing barangay sa samang lungsod. (Hulagway tampo sa Balamban police)

LALAKENG nakaplagang patay sa bukirang barangay sa lungsod sa Balamban nalambigit sa giingong usa ka investment scam sa Davao Region ug nagtago-tago sukad niadtong Hulyo 28, 2019.

Si Armando “Max” Bernaldez Oppus, 34, nakaplagang patay nga dunay mga samad sa dughan ug ulo sa Transcentral Highway sa Sitio Buli, Brgy. Cansomoroy, Martes sa gabii, Agusto 20.

Nailhan siya pinaagi sa iyang passport nga nakuha sa kapulisan sa dapit sa Barangay Sunog sa samang lungsod, diin gisunog ug gihug ang usa ka sports utility vehicle (SUV).

Si Oppus giingong chief executive officer sa Crowd Royals Real Estates Services, nga giingong nitanyag og “double your money” investment scheme sa mga investor.

Ang kompaniya nibukas og buhatan sa Digos City, Davao del Sur niadtong Mayo 22, 2019.

Si Police Major Christian Torres, hepe sa Balamban Police Station nga nahinabi sa Superbalita Cebu, nagkanayon nga ang biktima nailhan nila pinaagi sa driver’s license, passport ug mga resibo nga ilang nakuha sa Brgy. Sunog, diin gisunog ug gihulog ang Isuzu MUX nga may plakang AEB-4462

Matod ni Torres nga nakadawat silag tawag gikan sa Tactical Operations Office (PTOC) sa Cebu Provincial Police Office (CPPO) mga alas 9 sa gabii sa Martes nga dunay nakit-ang lawas daplin sa dalan sa Brgy. Cansomoroy.

Sa pag-abot nila, ilang nasuta nga si Oppus dunay mga samad pinusilan, ang baba giputos sa boxer shorts samtang ang mga kamot gibinaklid sa paggapos sa gamay nga panapton.

Nakakaplag usab sila og upat ka mga kabhang sa bala sa kalibre .45 nga pistola.

Paglabay sa pipila ka minutos, gipahibawo sila ni Kapitan Jose Pepito sa Brgy. Sunog nga dunay usa ka SUV kolor puti nga gisunog ug nahagbong sa pangpang.

Sa pagsuhid nila sa lugar, ilang naabtan ang sakyanan nga nagdilaab sa lawom nga bung-aw.

Ilang gisuhid ang dapit nga gihunongan sa sakyanan sa wa pa mahulog, apan wa silay nakit-an nga laing tawo nga kauban niini.

Daplin sa karsada nila nakit-an ang mga papelis, diin didto ang driver’s license, resibo ug passport ni Oppus.

Convoy

Si Torres niingon nga ang mga saksi ningbutyag nga tulo ka mga sakyanan ang nag-convoy, usa ka van nga puti, pick-up nga itom ug ang SUV. Sa pagbalik sa mga sakyanan, duha na lang ang ilang nakita.

Nagtuo si Torres nga gipatay daan si Oppus kay way nakadungog nga mga residente nga dunay mga buto sa armas.

Ang SUV hayan nahulog sa pangpang dihang nalanay ang mga ligid kay bahada man ang karsada. Di pa nila maestablisar kon asa gikan ang mga sakyanan sanglit way CCTV sa dapit.

Gisusi

Sa pagtawag nila sa Davao Police Provincial Office, ilang nasuta gikan sa Police Station 2 sa San Pedro Davao, nga milayas na si Oppus ug mga kauban niadtong Hulyo 28. Wa nay nahabilin sa ilang balay ug ang tibuok pamilya wa na igkita.

Matod ni Torres nga nasayran sa kapulisan nga sila si Oppus ug duha ka mga kauban nanibat kay dunay dakong kasong large scale estafa nga gipasaka batok kanila.

Nahibaw-an nila nga si Oppus maoy CEO sa Crowd Royals Real Estates Services, diin daghang mga reklamo sa ilang lugar kabahin sa nadala niining P400 milyunes.

“Ilang panimalay didto sa Davao, gi-abandonar naman daw!.. Sa pag-adto nilang mga pulis sa pagpangutana sa mga silingan, misibat naman dia-y ni sa mi-aging bulan paman nawala ang tibook pamilya,” dugang ni Torres.

Ang Police Regional Office (PRO) 11 niandam nag kasong large scale ug syndicated estafa human mangreklamo ang unom ka mga investor niadtong Hulyo.

Nasayran sa Superbalita Davao nga napasaka na ang kaso batok kang Oppus ug sa duha niya ka mga kauban nga sila si Edmond Barriga Quiñones ug Judy Ann Estrella.

Unang mireklamo ang mga biktima sa Davao City Anti-Scam Unit ug nagpatabang sab sa National Bureau of Investigation (NBI) aron masikop ang mga suspek.

Giingong nitanyag ang kompaniya ni Oppus og 100 ngadto sa 300 nga ginansya sud sa 30-45 ka adlaw sa ilang investment.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph