ANG pagsigi og pabadlong ni Joavan Fernandez, anak ni Talisay City Mayor Soc Fernandez, posibling makaapekto sa kampanya sa nauwahi sa umaabot nga piniliay.
Ning uwahi lang – pipila ka adlaw lang ang gintang - tulo ka sunodsunod nga mga panghitabo nga gibidahan ni Joavan ang nakakuha og atensiyon sa mga local media ug ngadto sa publiko.
Una, iyang gitawagan si Mayor Soc aron ipaalarma sa mga kapulisan ang usa ka imnanan sa usa ka motel sa Talisay tungod kay aduna kini hubo-hubo nga sayaw.
Nagtuo ang mayor nga tinuod ang gisulti sa iyang anak, dali niyang gisanong si Joavan.
Apan sa paghiabot sa kapulisan sa maong imnanan, way nakitang hubo-hubo ug ilang nasigpatan si Joavan ug ang grupo niini sa pikas lamesa nga nag-inom. Gituohan nga nagpabilib ra diay si Joavan sa management sa hotel.
Ikaduha, niadtong selebrasyon sa iyang adlawng natawhan, si Joavan mihimo na usab og kasikas, ug ning higayona, sa usa ka condominium unit sa dakbayan sa Sugbo.
Namugos siya sa pagsulod sa condominium aron mogamit sa unit sa iyang higala bisan og gidid-an sa security guard.
Gihulga ang guwardiya nga aduna siya’y dalang armalite hinungdan nga nitawag ang guwardiya sa mga kapulisan.
Kagahapon, gikataho nga nanamparos na usab si Joavan og pump boy sa usa ka gasoline station sa Bulacao, Talisay human wa tubili ang sakyanan niini og gasolina kay way gas slip nga gikapakita.
Bisan tuod og dili si Mayor Soc ang nagbuhat sa ingon, apan ang iyang grabing paglaban, pagpanalipod ug pagkonsenti sa mga binuhatan sa iyang anak maoy makapaduhig kaniya.
Kay sa bisan asa nga angguloha, ning binuhatan ni Joavan, siya hulga sa katawhan.