MISAKA na ngadto sa 70 ka mga indibidwal ang natalang namatay tungod sa dengue karong tuiga gikan sa Enero hangtod Agusto 17 ning tuig 2019.
Anaa na sa 17,701 ang nataptan sa dengue virus diin anaa sa 66.61 porsyento ang pagtaas niini kumpara niadtong nilabay nga tuig.
Ang dunay pinakadaghang kaso nga natala mao ang Bukidnon nga anaa sa 7,120 o 40 porsyento. Kasagaran niini mga lalaki nga anaa sa 53 porsyento.
Niadtong nilabay nga tuig, anaa lamang sa 3,946 ang Bukidnon apan karon anaa sa 7,120; Camiguin 260, karon 270; Lanao del Norte 1,343, karon 2,514; Misamis Occidental 2,495, karon 1,837; Misamis Oriental 1,159, karon 2,853; Cagayan de Oro City 1,062, karon 1,978; ug Iligan City 341, karon 1,129.
Gibutyag ni Dr. David Mendoza, OIC Director III, nga gi-localize na nila ang mga balaod aron nga mas epektibo ang kampanya batok sa dengue.
"Himoan nato og mga ngipon ang mga balaod sa kada local government. In fact, naa na ang Cagayan de Oro nagpanaog na sila og bag-ong ordinance supporting the sabayang 4'o clock habit already," matud ni Mendoza.
Gidugang pa ni Mendoza nga kinahanglan nga ipadayon ang kampanya sa nakigbatok sa dengue aron nga moubos na ang kaso batok sa dengue.
Nasayran nga nagpahigayon na ang siyudad sa Cagayan de Oro og clean up drive ilabi na alarming level na sab ang siyudad sa kasong dengue diin anaa na sa 15 ang natalang patay sa pagsulat niini nga balita.