PASLAK sa bilanggoan ang usa ka lalaki kini human giingong gisunog niini ang panimalay sa iyang ugangan alas 12:33 sa tungang gabii, Martes, Agosto 20, sa Barangay Indahag, Cagayan de Oro.
Ang maong lalaki naila nga si Romeo Caspe, aircon technician, 34, minyo ug residente sa Sta. Cruz, Consolacion. samtang ang tag-iya sa panimalay naila nga si Eddie Cagadas, 60, minyo nga taga Indahag.
Sa pakighinabi sa SunStar Superbalita sa kauban niini sa trabaho nga si Jomar Rebustes, gibutyag nga daw nawad-an kini sa pangisip ug nagtuo nga tungod sa iyang inahan nga namatay ug usa ka semana nga sigi og inom ug walay insaktong tulog.
"Murag wala pa na nakadawat sa pagkamatay sa iyang mama. Palangga kaayo sa iyang mama. Usa ka semana wala'y tarong tulog ug inom. Naa gyud kas-a alas 3:00 natulog. Grabe ang inom, unya mata alas 5:00 kay trabaho," matud ni Rebustes.
Samtang mibutyag usab ang silingan nga si Benancio Lamonsing, kinsa maoy nakakita sa panghitabo, nga nakita niini nga nidagan ang suspek sa dihang nasunog ang panimalay kinsa daan na kining nagbahad.
"Ako man una nakakita. nag singgita lage ko. Pagsinggita nako, dagan siya naghukas ra. Sa wala pa gisunog, daan na siya nagbahad nga iyang ipabuto," matud ni Lamonsing.
Gidugang pa nga human sa pagkasunog, wala kini nisibat ug mao pa ang nitaho ngadto kang Cagadas ug niingon nga, "Pa, ang imong balay nasunog na. Imo na nang problema."
Nasayran nga duna kini pagdumot sa ugangan ilabi na sa dihang kasab-an.
Gideklara usab sa tinugyanan sa Bureau of Fire and Protection og fire out mga alas 2:20, ug anaa sa mga P180 mil ang damyos.
Sa pagkakaron, kasamtangang anaa sa bilanggoan si Caspe.