GITUG-AN sa opisyal sa Metro Cebu Taxi Operators Association (Mctoa) nga daghan nang mga taxi drayber ang nagtinguhang mangayo og umento sa flagdown rate apan plano sa mga operator nga ang P10 nga add-on rate kaniadto maoy ibalik.
Ang tinguha sa mga drayber alang sa pagpaumento sa flagdown rate nitumaw human nila nasayran nga dunay gidusong petisyon ang mga taxi operators sa kaulohan ngadto sa Land Transportation Franchising and Regulatory Board (LTFRB) alang sa P10 nga umento sa flagdown rate nunot na usab sa pagmahal sa gasolina ug LPG.
Apan matod ni Quito Obeso, bise presidente sa Mctoa nga maglisod sila sa pagpangayo og umento gumikan sa kadaghan nang mga taxi dinhi sa Sugbo apan minos ang mga pasahero.
Hinuon dunay plano ang Mctoa nga mopetisyon alang sa pagpabalik sa P10 nga add-on rate kay alang kang Obeso mas paborable kini itandi sa dugang flagdown rate.
Apan matod ni Obeso nga magsabot-sabot pa sila sa Mctoa kon kanus-a kini pangayuon.
“Daghan na kaayong taxi pero minos ang pasahero. Kon momahal ang plitehan mosamot og kaminos ang mga pasahero. Mas maayo sigurong kadtong add-on nga P10 maoy atong ibalik,” pasabot ni Obeso.
Si LTFRB regional director Romulo Bernardes sa iyang bahin niingon nga wa pa siyay nadawat nga petisyon gikan sa Mctoa.
Andam hinuon ang ilang buhatan sa pagdawat sa bisan unsang petisyon kay ipaagi pa man usab hinuon kini og hearing.
Apan magdepende ra usab kini sa ilang ulohang buhatan kay kon ugaling dunay ipatumang umento sa kaulohan ug mahukman sa board nga ipatuman kini sa ubang rehiyon apil na sa Sugbo, matod ni Bernardes nga mosunod sila.