SUPERBALITA CEBU

Barrita: Service charge sa community service

Tipik sa Balaod

DUNAY duha ka mga bag-ong balaod ang gipirmahan ni Presidente Rodrigo Duterte. Ang usa maghatag sa 100 porsento sa service charge sa mga hotels, restaurants ug uban pa ngadto sa mga kawani. Samtang ang ikaduha magpahamtang sa silot nga community service inay pagkapriso sa mga ginagmay nga krimen.

Service charge

Ubos sa Republic Act No. 11360, nga gipirmahan sa pangulo niadtong Agusto 7, ang tanang rank-and-file ug supervisory employees makadawat sa 100 porsento sa service charge nga makolekta sa mga hotels, restaurants ug susamang mga establisimento.

Ang maong balaod nag-amendar sa Article 96 sa Labor Code of the Philippines. Ubos sa giamendahan nga balaod, ang mga kawani hatagan lang og 85 porsento sa service charge, samtang ang 15 porsento ihatag ngadto sa management. Karon 100 porsento na sa service charge ang ihatag sa mga kawani.

Way labot sa service charge ang mga managers, kadtong mohimo, morekomendar ug mopatuman sa mga managerial actions.

Community service

Ubos sa atong mga balaod, ang sentensiya sa pagkabilanggo, bisan kon pipila lang ka mga adlaw, pagapuy-an gyud sa prisohan, gawas lang kon ang konbiktado mopahimus sa probation.

Apan ubos sa Republic Act No. 11362, ang Community Service Act nga gipirmahan sa pangulo niadtong Agusto 9, gitugotan ang mga hukmanan, segun sa ilang kabubut-on, sa pagpahamtang sa community service inay sa pagkabilanggo.

Ang community service alang lang sa mga krimen kansang silot mao ang arresto menor o pagkabilanggo gikan sa usa ka adlaw ngadto sa 30 ka adlaw ug sa arresto mayor o pagkabilanggo gikan sa usa ka buwan ug usa ka adlaw ngadto sa unom ka buwan.

Tumong ning maong balaod ang restorative justice ug ang pagpaluag sa naghuot nga mga prisohan. Ang community service mao ang “actual physical activity which inculcates civic consciousness and is intended towards the improvement of a public work or promotion of public service.”

Ang mopahimus sa community service moagi usab og rehabilitative counseling ubos sa usa social welfare and development officer sa syudad o lungsod nga hingtungdan uban sa pag-abag sa Department of Social Welfare and Development (DSWD).

Ang pribilihiyo sa community service mapahimuslan sa usa lang ka higayon. Kadtong makalapas sa mga kondisyones sa community service mahimong ipapriso sa hukmanan aron silbihan ang tibuok silot, mahimong sa prisohan o sa pinuy-anan subay sa Revised Penal Code. (edbarrita@gmail.com)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph