NAHIMO nang personalan ang pag-insister ni Lapu-Lapu City Congresswoman Paz Radaza tali ni Mayor Junard “Ahong” Chan sa pagbutang og pag-ukupar sa kongresista sa iyang buhatan sa City Hall. Wala mopahawa si Congresswoman Paz sa City Hall bisan sa pag-awhag sa mayor. Gani gi-padlock na sa mayor ang maong buhatan. Apan anaa gihapon sa gawas sa opisina ang mga staff ni Radaza nagbutang og lamesa og nagpadayon pagdawat sa mga tawo nga mangayo og hinabang sa kongresista.
Niadtong miaging adlaw, nahimong kataw-anan kay sa pag-abot sa mga staff ni Radaza sa ilang lamesa sa gawas nanimaho na kini og hugaw sa iring. Ug sa ilang pagsuta, diha nay mga hugaw sa iring sa ubos sa ilang lamesa. Ug ang mga mantil sa lamesa gibutang usab og hugaw sa iring. Puwerting bahoa ra ba ning hugaw sa iring. Mangalisbo gyud. Nanghimakak si Mayor Chan nga siya maoy nagpabutang sa hugaw sa iring ug matod niya nga wala siya magsugo sa iring nga adto malibang.
Siguro adunay mga siaw nga mga supporters ni Chan nga naglagot na sa maong kontrobersiya nga nagbutang niadto. Basig sa sunod ug dili pa gyud mopahawa ang mga staff sa kongresista, hugaw na sa tawo ang ipatong sa lamesa.
Pero dili naman unta moabot pa aning puntuha nga ma-personalan ug mayaga-yaga na ang isyu kon si Kongresista Radaza nagbaton lang unta og delicadeza.
Ngano man gyud nga mamugos siya. Ang mayor maoy dili gusto ug ang mayor maoy building ug property administrator sa City Hall. Kanang ordinansa nga gibasihan ni Radaza way nada kay gidispuga ang pagpapasar ana.
Gawas pa aduna nay opinyon si DILG Secretary Eduardo Ano kabahin niini nga dili puwedeng mag-opisina si Radaza diha sa City Hall. Nangita man gyud og gubot kini si Congresawoman Paz nga naa na man siyay giabangan nga opisina diha sa Basak barangay hall. Unsaon man na niyang daghang opisina? Bisan adto pa siya mag-opisina sa Kintolimbo, mosunod gyud ang mga tawo. Delicadeza lang unta ba. (bobbygnalzaro@gmail.com)