DUNA kahay sipyat ang mga elemento sa Criminal Investigation and Detection Group (CIDG) sa Central Visayas sa pag-raid nila sa buwangan sa Barangay Estancia sa Mandaue City niadtong Agusto 5, Lunes diin dul-an sa 400 ka mga sabongero ang nangasikop.
Si Police Major Edwin Lacostales, ang nangulo sa raid, miangkon nga adunay permit sa pag-operate ang D and C Coliseum, apan iyang gipasabot nga ubos sa Presidential Decree 449 o Cockfighting Law kinahanglang ang matag tari ug derby himuon sa Dominggo o holidays.
Matod niya nga ang maong buwangan mag-operate hapit na kada adlaw, hinungdan nga kini ilang gironda.
Atong gitamod ug girespetuhan ang pagpasabot ni Lacostales, pero dili usab nato masalikway ang mga pangutana ug pagduda kon nasubay ba kini sa balaod.
Wa ba diay masayod si Lacostales nga ang PD 449 nga niadto pang 1974 nahimong balaod, hingpit na nga napapas human napasar ang PD 1802-A sa 1981 nga naghatag sa local government units og katungod pag-regulate sa mga buwangan.
Polisiya ba diay sa CIDG-7 ang pagderitso na lang og pagpangronda nga dili una motino kon unsay anaa sa balaod?
Unsa man gipasakaan na ba nila og kaso ang ilang gipangsikop ug unsa man say kaso nga ilang i-file? Wa bay illegal detention silang nahimo niadtong higayona?
Samtang atong gidasig ang atong mga tinugyanan sa balaod sa pagpadayon sa hugot nilang kampanya batok sa mga illegal nga binuhatan o negusyo, hinaot nga ipasubay unta usab kini nila sa saktong balaod.
Atong ihangad nga unta naleksiyon ang maong ahensiya sa ilang gihimo kay daghan intawong mga pamilya, ilabi na sa mga ordinaryo og kabus nga nanginabuhi sa buwangan ang nahasol ug nasakripisyo tungod lang sa ilang pagpataka ug pagpasagad.