SA UNA pa lamang niyang pagkakita kang Eliza dili na si Aurelius makatulog og maayo. Alang kaniya talagsaon kining mao niyang pagbati. Usa lang siya ka ordinaryong tawo nga nagsalig lang sa suweldo gikan sa kompaniya nga iyang gitrabahoan, ug kataw-anan usab kay ang babaye nga maoy natingban sa talagsaon niyang pagbati anak sa dato nga pamilya. Ang ginikanan ni Eliza daghang negusyo nga mikatap sa siyudad: mall, hotel, motel, real estate, shipping, ubp.. Alang kaniya, nahisama siya sa usa ka buang nga naghanduraw sa katahom ni Eliza. May katahom si Eliza nga wala niya makita sa ubang mga sikat nga mga babayeng artista.
Ang pangutana mao, unsay nakaaghat kang Eliza nga mag-artista siya? Anak siya og dato nga misuway sa kalibutan sa showbiz nga puno sa mga isyung tinuod ug bakak? Pastilan, katingalahan sab kini si Eliza. Nakita niya si Eliza sa personal dihang nag-promote kini sa iyang bag-ong pelikula nga nag-ulohan og ‘Death in the Unknown Bridge’. Usa kini ka international movie ug kauban niya dinhi ang iyang leading man nga si Abel Mascardo, ambungan nga ulitawong aktor nga daghan nang movie awards nga nadawat tungod sa iyang abilidad sa pag-arte.
Sulod sa usa ka dakong Mall nakita ni Aurelius si Eliza kuyog sa pipila ka artista nga mga sikat usab. Milanog ang tingog ni Aurelius nga misinggit ug mitawag kang Eliza.
“Elizaaaaaa! Ako kiniiii siii Aureliusssss! Ikaw ang anaa kanunay sa akong mga damgo sa gabiing tanannnnn! Misamot kalanog ang tingog sa ulitawong nabuang sa usa ka paghigugma nga layo kaayo sa katumanan.
“Aurelius, ayaw... ayaw pagduol kang Eliza! Babagan ka sa guwardiyaaa!” hulbaw ni Santos, iyang higala, nga nakabantay sa buot niyang buhaton.
Apan misaka gyud si Aurelius sa stage ug nag-selfie uban ni Eliza. Si Eliza mipahiyom ug mihalok sa aping ni Aurelius. Nakalukso siya sa tumang kalipay. Unya miingon si Eliza sa hinay nga mga pulong, “Ikaw diay si Aurelius nga usa sa mga fans nako! Lunod-patay nga fan o magdadayeg?”
“Oo, ako... ako! Mahal ko ikaw, Eliza. Gihigugma ko ikaw!” ni Aurelius nga hugot nga migakos sa artista nga kanunay niyang gidamgo.
Unya kalit nga mihingos-hingos si Aurelius nga naglisod pagginhawa. Miluag ang iyang paggakos kang Eliza ug natumba siya sa stage. Wala na siyay kinabuhi dihang gisusi sa guwardiya. Apan may malimbationg pahiyom sa mga ngabil ni Aurelius, kaha nalipay siya kay ang babaye nga iyang gihigugma iyang nagakos ug nahagkan. Karon, patay na si Aurelius, usa ka ‘fanatic’. (KATAPUSAN)