DEAR Noy Kulas,
Tawga lang ko og Andrea. Taga Cebu ko kaniadto pero naa na ko sa abroad nagpuyo uban sa akong pamilya. Dunay di maayong hitabo sa akong kinabuhi. I mean sa akong kaminyuon. Giluiban ko sa akong bana few times na.
Ka usa, nagsugod ang akong duda sa akong bana nga dunay gitagoang relasyon sa laing babaye kay nasakpan nako ka usa nga duna siyay gitago nga cell phone sa iyang sakyanan. Didto niangkon siya nga nagkarelasyon sila sa iyang classmate sa college ug dunay nahitabo nila pag-uli niya sa Cebu.
Di ra ni mao kay few times I caught him again cheating sa lainlaing babaye hangtod nga ako na siyang gipalayas sa balay.
Ning bag-o lang, ni-contact na siya nako ug nangayo og pasaylo sa tanan niyang gibuhat. Gusto na siyang mouli sa amoa kay gimingaw na siya sa among mga anak.
Noy, maayo kaha nga ako na lang siyang dawaton? Pero di man ko makaseguro nga moundang na siya sa iyang bisyo human ko niya traydori uban sa lainlaing mga babaye? Unsa kahay ikasulti sa among mga anak, nga ako rang gi-tolerate ug gidawat ang gibuhat sa ilang amahan? Nagduda ko nga until now naa pa silay relasyon sa iyang classmate. Please tambagi ko aron maka decide ko.
ANDREA
Andrea,
Mas maayong makigsulti ka sa inyong mga anak kabahin sa hangyo sa ilang amahan nimo. Paminawa ang ilang sentimento una ka pa makigsulti sa imong bana alang sa imong paghukom kon dawaton mo ba siyag balik o dili. Kon uyon ang inyong mga anak, ayaw lang sab dayon siya padayuna sa labing daling panahon ug kasayon.
Pagtagbo-tagbo lang una mo sa gawas aron imo usab nga masuta kon honest ba siya o di sa iyang katuyoan sa pagbalik. Mahimong sa inyong panagtagbo kuyog nimo ang inyong mga anak. Kana bang tan-awon o sukdon kon unsay inyong ma-feel with him around.
Unya, butangi og mga kondisyon nga higpit kon mobalik man siya ninyo aron makita mo usab kon andam na ba siyang mag-usab. Mag-unsa man ang pagbalik kon wa gihapon siyay kausaban sa iyang pagbisyo. He must change and honest sa inyoha sa iyang pagbalik, kana kon imo siyang dawaton pagbalik.
NOY KULAS