NAPALGANG patay ang usa ka construction worker nga missing na sud sa usa ka adlaw sukad kini nanguha og taklong, usa ka matang sa hila-hila, sa kakahuyan sa may Brgy. Buhisan, siyudad sa Sugbo.

Dunay mga pagduda nga forest guard ang responsable sa krimen, apan susihon pa kini sa mga imbestigador.

"The Manny Pacquiao Blog". Click here for stories and updates on the Filipino boxing champ.

Napalgan ang biktima pasado alas 6 sa buntag niadtong huwebes apan naadto sa kapulisan ang dapit nianang hapon.

Ang biktima giila nga si Baveincio Villona, 39, taga Sityo Lower, South Hills, Barangay Tisa ning siyudad.

Ang pasiuna nga imbestigasyon gihimo nila ni PO3 Geofrey Gutual, PO2 Lou Pagara, PO2 Leroy Baguio ug PO2 Cristobal Geronimo, nagbutyag nga nianang pasado alas 4 sa hapon niadtong Miyerkules, nananghid ang biktima sa iyang inahan nga moadto sa lugar aron manguha og taklong.

Apan nahibulong na lang ang inahan nga wa na mauli nianang gabii ang biktima. Si Manuel Laborte, pag-umangkon sa biktima uban ang ilang mga silingan, gisugo sa inahan nga ipasusi ang dapit kay wa pa mauli ang biktima.

Pag-abot nila ni Laborte sa dapit, ilang nakita ang biktima nga nagtakilid nga naghigda nga nasangit sa dakong gamot sa kahoy.

Niresponde ang kapulisan nga gipahibawo.

Niabot ang mga pulis duha ka mga oras sa dapit gikan sa ilang paglakaw.

Nakita nga may samad pinusilan ang biktima sa buko-buko nga milapos sa iyang dughan ug may samad sab sa ulo ug natapsingan ang bukton niini.

Napalgan usab sa kapulisan, 20 metros gikan sa iyang lawas ang unom ka mga kabhang sa bala gikan sa armas nga Carbine.

Sa dihang nagdulong pa ang kapulisan sa dapit, nakita nila ang pinutol nga mga kahoy nga mahogany.

Ila sab nga nakit-an nga nga nawaling ang mga sagbot sa dapit timailhan nga natunoban kini og tawo.

Usa ka tinubdan sa Sun.Star Superbalita nagbutyag nga adunay mga forest guard sa dapit ug armado kini og carbine. Ang forest guard wa igkita sa kapulisan atol sa ilang pagresponde.(JFT)