TROPICAL depression “Ineng” hayan mahimong bagyo sa mosunod nga 24 oaras, apan hayan di mag-landfall base sa iyang kasamtangan nga direksyon sa pag-irog, matod sa Philippine Atmospheric, Geophysical and Astronomical Services Administration (Pagasa) sa Miyerkules, Agusto 21.
Sa alas 10 sa buntag sa Miyerkules, ang mata ni Ineng nahimutang mga 1,155 kilometros silangan sa Infanta, Quezon, nga dunay 55 kilometros matag takna nga hangin ug unos nga 70 kilometros matag takna.
Matod sa Pagasa nga nagpabilin ang kusog ni Ineng samtang hinay nga nag-irog paamihanan.
Ang Visayas, Mimaropa, Bicol Region, Zamboanga Peninsula, Bangsamoro, Northern Mindanao, Caraga, ug Davao Region makasinati og mapanganuron nga panahon nga dunay panagsang pag-uwan ug pagpangilat tungod sa pag-agi sa bagyo, matod sa Pagasa.
Giawhag sa Pagasa ang mga residenteng nagpuyo sa dapit o duol sa mga dapit nga bahaanan o mag-landslide sa pagpangandam.
"Residents in the aforementioned areas are advised especially those living in areas identified to be highly or very highly susceptible to floods and rain-induced landslides, are advised to take precautionary measures, coordinate with local disaster risk reduction and management offices, and continue monitoring for updates," matod sa Pagasa sa iyang advisory.
Gipaabot nga sa Lunes mogawas na ang bagyo sa nasod.
Ang bagyong Ineng mao ang ikasiyam nga bagyo nga miigo sa nasod ug ikaduha ning buwana.
Labing minos 20 ka mga bagyo ang moigo sa Pilipinas matag tuig.
Karong Agusto, gibana-bana sa Pagasa nga upat ka mga bagyo ang moigo sa nasod karong buwana.
Sayo sa Agusto, gideklarar sa Pagasa nga wa na ang weak El Niño. Tungod niini, gipaabot ang pagsige na og uwan. Taliwa sa pag-uwan, gikabalak-an nga mosaka pa og maayo ang mga kaso sa dengue sa nasod.
Ang Department of Health nideklarar og dengue epidemic sa nasod. (SunStar Philippines)