BURAUEN, Leyte -- Duha ang nasikop sa kapulisan ug Philippine Drug Enforcement Agency (PDEA) 8 sa anti drug operation ning lungsod, Martes, Augusto 20, 2019.
Giila ang mga dinakpan nga sila si Melchor Coranes, 40, barbero, ug Bertino Mas-ing, 48.
Ang duha pareho nga nagpuyo sa District 6 sa lungsod.
Napalit gikan ni Coranes ang 10 ka mga pakete nga dunay marijuana ug lain usab nga usa ka pakete sa gituhoang shabu ang nakuha sa posisyon.
Samtang nakuha gikan kang Mas-ing ang P500 nga marked money, cash nga P410 ug 310 ka putos sa marijuana. Matod sa kapulisan nga daghan na silang nadawat nga report bahin sa ilegal nga kalihukan sa duha.
Niini, nagpositibo, busa gilusad sa kapulisan pinangulohan ni Police Captain Luis Hatton ug Police Major Allan Cerro ang operasyon uban sa PDEA. (JKDP)