SI PRESIDENTIAL Spokesperson Salvador Panelo nanghimakak nga siya ang nagpaluyo sa nag-ung-ong nga paggawas gikan sa bilanggoan ni kanhi Calauan, Laguna mayor Antonio Sanchez, nga gikombikto sa kasong rape ug murder.
Si Sanchez gikombikto niadtong 1993 sa paglugos ug pagpatay sa tinun-an sa University of the Philippines Los Baños nga sila si Eileen Sarmenta ug sa uyab niining si Allan Gomez.
Ang matahom nga Sarmenta gihatag nga “regalo” ngadto sa mayor, nagpakita ang mga dokumento sa korte.
Si Panelo usa sa mga abogado ni Sanchez, kinsa napahamtangan og silot nga pito ka mga reclusion perpetua kon pagkabilanggoa hangtod sa 40 ka tuig niadtong Marso 11, 1995.
“Mukhang masyadong malayo naman ‘yun. Twenty seven years ago pa ako abugado noon. Dati nag-withdraw na ako. Even before the appeal, nag-withdraw na ako,” matod ni Panelo sa usa ka phone interview tali sa mga Palace reporter.
“Hindi na kailangan ng guidance ng sinong tao na mag-intervene o lumakad sa release kasi merong batas na nag-benefit si Mr. Sanchez at saka ‘yung 11,000 pa,” siya nidugang.
Sila si Sanchez, uban sa 11,000 ka mga binilanggo, gipaabot nga buhian sa mosunod nga duha ka mga buwan tungod sa bag-ong balaud nga nagdugang sa good conduct time allowance ug sa hukom sa Korte Suprema sa pagpatuman niini.
Ang Republic Act 10592 nagpalapad sa application sa good conduct time sa usa ka binilanggo bisan atol sa preventive niyang pagkabilanggo, ingon man ang gidaghanon sa mga adlaw nga mahimong i-credit sa maayong buhat.
Ang good conduct time allowance makuha pinaagi sa pagtinarong sulod bilanggoan. Magpaminos kini sa mga adlaw nga gisilot kaniya.
Matod ni Panelo nga administrasyon ni Presidente Rodrigo Duterte nagpatuman lang sa balaud, bisan unsa ang status sa piniriso.
“Kung ano ang batas, sundin natin. ‘Di ba sabi ni Presidente, just follow the law and everything will be in place,” siya nagkanayon. (SunStar Philippines)