MALAUMON si Lapu-Lapu City Mayor Junard “Ahong” Chan nga dili mopatigbabaw ang politika sa konseho sa dakbayan sa higayon nga tukion na nila ang pagdeklarar og state of calamity sa isla sa Olango.
Una nang gideklarar sa City Disaster Risk Reduction and Management Council (CDRRMC) nga gipangulohan ni Chan niadtong Agusto 9.
Apan, ang naasoyng deklarasyon kinahanglan pa og approval sa konseho sa dakbayan.
Ubos sa naasoyng deklarasyon nagkinahanglan ug kwarta ang kagamhanan sa dakbayan alang sa pagpalit ug hinabang ngadto sa mga molopyo sa isla.
Dili mominos P7 milyunes ang gipangayong pundo sa kagamhanan alang sa ilang itunol nga hinabang sa moabot dul-an 6,000 ka mga apektadong molopyo sa isla nga naapektahan sa pag-isa sa gale warning sa isla duha ka semana na ang nakalabay.
Matod ni Chan, ang makadawat sa hinabang mao kadtong mga nanginabuhi sa dagat nga apektado dihang aduna pay gale warning.
Wala man tuod makadawat ug taho si Chan nga mobabag ang konseho sa ilang unang deklarasyon apan buot lang maniguro ang mayor nga dili siya maigo sa pamolitika.
Nasayran nga duha lang sa 12 ka mga konsehal ang orihinal nga kaalyado ni Chan sa konseho samtang, 10 ang kang kanhi mayor ug karon Congresswoman Paz Radaza, wala pay labot niini ang duha ka ex-officio member nga mao ang Sangguniang Kabataan SK Federation President ug Association of Barangay Council ABC President.
“Wa ko kahibalo nga dili nila ipasar ang ako ako lang silang ginunhan nga basin ug duna nasay momando nga tawo nga papugngan ni siya,” matod ni Chan.
Si konsehal Rico Amores nga usa mga sa konsehal nga kaalyado ni Radaza mipasalig nga kun alang sa kaayohan sa mga apektadong molupyo sa isla sa Olango wala silay rason nga mobabag niini.
Gipasabot hinuon ni Amores nga wala malakip sa agenda sa miaging siyon sa konseho ang rekomendasyon ni Chan sa pagpaubos sa state of calamity sa isla sa Olango ug wala usab siya makasiguro kun nalakip ba kini sa agenda sa sisyon karong adlawa.
Samtang sa tuyo nga malikayan nga maapektohan na usab ang mga molopyo sa isla kun ugaling aduna na usay gale warning gihinabi na ni Chan ang tag-iya sa roll-on roll-off o roro barge nga magbiyahean sa mainland padulong isla sa pag-upgrade sa ilang gross tonnage.
Kini human nga ang gross tonnage sa RoRo nga nagbiyahian sa mainland ug isla sa dakbayan moabot lang sa 248 gross tonnage.
Ubos sa lagda sa Philippine Coastguard 250 gross tonnage lang ang mahimomg makabiyahe panahon nga adunay gale warning.
“Para non-stop ang pagbiyahe sa Olango, usa ra ni siya pero kung kinahanglanon ug additional the owner is willing to add one more vessel,” matod ni Chan ngadto sa SunStar Cebu. (GCM)