ATONG gihisgutan sa milabay nga semana ang hilom nga mga lakang sa China nga buot mogahom sa kalibutan.
Kung sa kadaghanon sa ilang ihap sa kasundalohan mas daghan ang pwersa sa China kun itandi sa America. Mas dako sab ang ilang deposito sa lana, apan dali lang sab mahurot ang ilang pundo tungod sa kadaghan sa ilang populasyon ug naghuot na sa ilang nasud.
Kung sa alyado nga mga nasud, mas daghan ang kauban sa America kay Russia man lang ang gamhanang nasud nga kaanib sa China.
Ang kasaysayan nagasulti nga makadaghang higayon nakasinati og kapildihan ang China sa natad sa gubat apan ang ilang mga pangulo apil ang kasundaluhan naga laraw nga kuptan gyod ang gahom sa umaabot nga mga adlaw aron ipatigbabaw ang gahom sa nasud nga gisimbulohan sa Dragon.
Ang ilang mga lakang nagapadayag sa ilang pagpalig-on sa ilang armada, gani man ilang ginapakita ang ilang gahom sa ilang pagtukod sa isla sa kadagatan sa South China Sea alang sa ilang base sa kasundalohan.
Nahimong dako nga isyu karon ang pagdaghan sa mga Intsek nga naga trabaho sa mga pasugalan nga ilang gitukod duol sa mga kampo sa kasundalohan sa atong nasud sa Pilipinas ug gidudahan nga mga tigpaniid o spy unsay lihok sa atong kasundaluhan.
Maayo man unta ang pag pakighigala ni President Rodrigo Duterte sa nasud China tungod wala tay katakus nga makig giyera kanila aron kuhaon pagbalik ang luna nga ilang gihimong artificial island sa South Philippine Sea.
Karong bag-uhay lang, mipalag na si Defense Secretary Delfin Lorenzana kay makadaghang higayon na nga naglawig ang barkong igugubat sa China sa kadagatan nga sakop sa atong nasud nga wala nagpahibalo unsay ilang katuyoan nga naa sila sa dapit nga dili ila.
Atong masabot nga dunay dili maayo nga laraw kining mga tawhana nganong ila man gyod tuyoon ang pagsulod sa mga dapit diin wala silay labot.
Kung magpabilin nga dili mohimo ug mga lakang ang kagamhanan sa pagsanta kanila, mo mata nalang ang mga Pinoy nga ulipon sa mga intsek nga buot mosakop kanato.
Buot kontrolahon sa China ang South China Sea aron ibutang ang ilang depensa sa mga barkong ig-gugubat nga mosulong kanila kay moagi man gyod sa maong dapit.
Buot sab nila kuhaon ang maong lugar tungod duna pay daghang deposito sa lana ilalom sa kadagatan, gani man buot sila makig-uban sa oil exploration aron kuhaon ang deposito nga lana sa South Philippine Sea.
Human sa katuigan sa pagka ulipon sa Español ug Kano mosugot ka ba nga magpaulipon na sab ta sa mga Intsek?