DILI mominos P.5 milyunes nga balor sa ilegal nga drugas ang nasakmit sa Waterfront Police Station ug Carbon Police Station sa ilang managlahing anti-drug operation sud sa upat ka oras diin ang ilang mga dinakpan naglakip sa high value target sa kapulisan.
Wala pa gihapon hingpit nga nangundang ang mga drug personalities sa ilang illegal nga negosyo sa drugas human mangadakpan sa subsob nga kampanya sa kapulisan diin naka sakmit sila og tunga sa milyon ka pesos.
Ang Carbon police station naka sikop sa giila nga high value target nga drug personality sa sitio Pig vendor barangay Ermita sa siyudad sa Sugbo, pasado alas 11:00 niadtong Martes sa gabii Agusto 20.
Ang nadakpan giila nga si Marc Vincent Lacno alyas Bento,l 29, taga Sitio Villa Mangga, Barangay Bulacao, siyudad sa Sugbo.
Nakuha kaniya ang mga pinakete sa gituihang shabu nga motimbang sa 15.9 gramos nga shabu nga mobalor sa P108,120,00.
Samtang sa Waterfront Police Station, nasikop ang upat ka mga drug pusher atol sa ilang buy bust kagahapon sa kaadlawon sa managlahing lugar sa dakbayan.
Ang mga nangadakpan mao silang Rogelio Ciano alyas Roger 40, nga taga Ponce 2 barangay Carreta nga nasakmitan og 12 gramos nga mobalor sa P81,000, Angelito Alcachupas alyas Sadam, 24, nga nakuhaan usab og 15 gramos nga mo kantidad sa P102,000.
Sa sitio Laray Ponce 2 barangay Carreta nadakpan usab silang Ronnie Lape 40, ug Editha Abellana 55, nga nakuhaan usab og 25 gramos nga mobalor ang tanan sa P170,000.
Matod ni Major Joemar Pomarejos nga pulos nalakip sa high value target list ang mga dinakpan diin taod-taod na nilang gipanid-an sa maong mga dapit.
Gipaubos na sila sa imbestigasyon kung asa sila magkuhaan sa ilang supply sa ilegal nga drugas nga giila sa waterfront police station nga dinagko na ang transaction sa mga suspek.
“Taudtaod na nato sila nga gi monitor sir ug sa atung information maka dispose ni silag tag 20 grams matag adlaw,” matod ni Police Major Joemar Pomarejos.
Sukad sa miaging semana, miabot na sa dul-an P4 million ang nakuha sa kapulisan sa siyudad sa Sugbo sa ilang sinimana nga one time big time operation.
Sa mosunod nga mga adlaw, matod sa heoe sa Cebu City Police Officew (CCPO), Police Colonel Gemma Vinluan, nga aduna pay laing drug personalities nga target sa ilang anti- drug operation. (AYB)