PADAYON pa nga ginasubay sa kapulisan sa Davao Region aron ilhon ang giingong pulis nga mipatay sa usa ka iro sa Sto. Niño, Barangay 2-A, Poblacion, Magallanes, Davao City niadtong Martes, Agosto 13.
Sumala sa Police Regional Office (PRO)-Davao spokesperson Police Major Jason Baria nga subayon una nila ang maong impormasyon aron ilang maila ug patubagon sa salaud ang nasampit nga pulis.
Una nang gipanganti sa kapulisan nga dili nila palabyon ang mga pulis nga badlungon ug nakahimo og salaud, inay ilaha dayon kining patubagon ug silutan og kaso subay sa balaod.
Una niini, nasubo pag-ayo ang tag-iya sa iro dihang ilang napalgan sa ilang tugkaran nga naglunang na sa dugo ug wala nay kinabuhi ang maong iro.
Sa post sa social media sa tag-iya sa iro, iyang gisaysay nga nagdula og madjong ang nagpailang pulis ug dihang gisamokan siya sa sige og paghot sa iro, iya kining giduol dayon gidunggab og pocket knife.
Gilayong nagpa-blotter sa San Pedro Police Station ang tag-iya sa iro ug ila na sab gidangop sa barangay ang maong hitabo.
Gipangandaman na sab sa Animal Rescue Rehabilitation & Fostering-Davao, Inc. ang pagpasaka og reklamo batok sa gireklamo nga nagpailang pulis.
Sukad sa pagsuwat ning balita Miyerkules, wala pa nabutyag sa PRO-Davao kung kinsa nga pulis ang responsable sa pagpatay sa iro.