NABANGALAN nga patay na ang milayas nga chief executive officer (CEO) sa Crowd Royals Real State Services kinsa nag-atubang og kasong large scale estafa sa Davao Region.
Sa official Facebook page sa Balamban Police Station sa Cebu City Provincial Police Office 7, gitaho nga nabangalan ang patay’ng lawas sa usa ka lalaki didto sa Barangay Cansomoroy ug uwahing nailhan nga mao si Armando Bernaldez Oppus, taga siyudad sa Davao, pinaagi sa iyang passport ug ubang identipikasyon.
Subay sa maong police report, nasayran nga banda alas 9:40 sa gabii, Martes, Agosto 20, nakit-an ang patay’ng lawas niini nga nagbuy-od kilid sa dalan ug nakahikot ang mga kamot, gitabonan og boxer shorts ang nawong ug adunay mga samad pinusilan sa nagkadaiyang bahin sa lawas.
Mga imbestigador sa Scene of the Crime Operatives (Soco) nagbutyag nga nakapunit sila og upat ka basiyong bala sa kalibre .45 nga pistola sa crime scene.
Ang press release nga gilagdaan ni Police Major Christian Torres, dugang nagbutyag nga pipila ka minuto ang milabay, narekober sab sa kapulisan ang usa ka MUX Nissan SUV, nagbaton sa plakang AEB 4462 human gidabdaban ug gihulog sa pangpang didto sa Sitio Cambagocboc sa Barangay Sunog, Balamban.
Sa maong sakyanan, narekober sa kapulisan ang driver’s license, passport ug 47 ka buok tag-usa ka gatos pesos nga iya sa biktima.
Wa pay matudlong suspek ang kapulisan ug gisubay pa ang motibo sa krimen.
Kahinumdoman nga si Oppus, kuyog ang lain pang mga kauban nga sila Edmond Bariga Quiñones ug Judy Ann Dalatina-Estrella, una nang milayas human gitangag ang kapin kun kulang P400-milyones gikan sa mga investors sa kompaniya gikan sa Davao Region niadtong Hulyo 27, tuig kasamtangan.
Unang mireklamo ang mga biktimang investors sa Davao City Anti-Scam Unit ug nagpatabang sab sa National Bureau of Investigation (NBI) aron masikop ang mga suspek.
Sa nahitabo, bugtong sila si Quiñones ug Estrella na lamang ang nagpabilin nga mag-atubang sa maong kaso.