Casas, Daluz gitahasan ni Labella sa problema sa mga kapitan

GITAHASAN ni Mayor Edgardo Labella sila si City Administrator Floro Casas Jr. ug Special Assitant to the Mayor Atty. Jose Daluz III sa paghatag og solusyon sa problema sa mga barangay kapitan alang sa epektibo nga paglimpyo sa basura.

Kini human nipadangat sa problema si Kapitan Dennes Tabar sa Barangay Banilad, kansang mga empleyado sama sa garbage loaders ug garbage truck drivers, wa pa maisyuhi og authority to serve gikan sa Office of the Mayor.

Gikinahanglan nga mapirmahan sa mayor ang authority to serve aron mahatagan sa ilang allowance ang mga barangay personnel.

Ang mao nga mga personnel maoy kaabag sa mga barangay opisyal sa paglimpyo sa mga dapit ubos ilang jurisdiction.

Ang kapitan sa Banilad niingon nga nagdawatan ra og P1500 matag buwan ang loaders, drivers, tanod ug lupon nga dako na unta og ikatabang sa ilang suholan ang financial assistance sa siyudad.

“Imo na silang suguon manarbaho na, apan remember maghunahuna sad na sila sige ta og panglimpyo. Naa kaha mi madawat sa City?,” dugang sa kapitan sa Banilad, kinsa adunay duha ka drivers ug lima ka loaders.

Si Tabar nagkanayon nga sila na sab ang nagkolekta sa basura bisan kon anaa sa national highway nga trabaho unta sa Department of Public Services (DPS) .

Nisamot ilang problema kay giingong gikunhoran sab ang gigahin kanila nga krudo.

Si Daluz nitug-an sa Superbalita Cebu nga makigkita pa siya ni Casas para sa lakang nga ilang buhaton. (PAC)