LIMA na ka tuig nga nagsige og panghatag og tanom nga Citronella si kasamtangang Misamis Oriental Integrated Sports Center (Moisc) General Manager President Elipe.
Kini ang iyang gisulti sa SunStar Superbalita nga usa sa paagi aron makigbatok sa lamok.
Mamatikdan ang tanom sa kilid-kilid nga bahin sa Moisc kon asa daghan ang gapangayo niini aron matanom.
"Kini among ihatag....kung magdaghan sa inyo ipanghatag pod sa lain," matud ni Elipe, kinsa mipasabot nga ang citronella oil maoy nag-unang ingredient sa mga lotion ug oil batok lamok, lakip pa kining mga patches.
Dugang niini nga epektibo kaayo nga luwas sa lamok ang palibot kung adunay tanom nga citronella tungod kay walay mosalir nga lamok gumikan sa baho niini.
Nihatag sab kini og instruksiyon unsaon pagtanom og citronella.
Una mao ang ga usa ka dangaw gikan sa gamot sa punoan itanom kini. Ikaduha, ang pinutol nga dahon nga sama sa tanglad, pwede ibutang sa vase, kumuton lang aron moalisngaw ang baho niini sulod sa balay ug walay lamok.
Sa Cagayan de Oro ug Misamis Oriental, alarming na ang kaso sa dengue gumikan sa kataas niini ug daghan ang nataptan.