DILI pa makumpirmar sa Bureau of Fire Protection (BFF) ang hinungdan sa pag-ulbo sa kalayo sa Western Kolambog, Barangay Lapasan, siyudad sa Cagayan de Oro niadtong Martes sa hapon nga nikalas og kinabuhi sa usa ka special child.
Nitumaw ang taho atol sa hitabo nga nagdula og kalayo si Thalia Racero, 16, usa ka special child, samtang duna usab niingon nga natulog lamang kini niadtong higayona.
"Naay possible nga mahimong witness nga nakakita nga nagsunog siya only lang sa pagkakaron, wala pa nakuhaan og affidavit. Magpabilin nga dili pa gyud ma-confirmed. Mao may pinaka anggulo nga nakita," butyag ni Senior Fire Officer 3 Samson Velarde, hepe sa Carmen Fire Station.
Samtang naghangyo si Kapitan Julito Ogsimer sa Barangay Lapasan nga mag amping kanunay labina na duha ka sunod-sunod nga sunog na ang nahitabo sa barangay karon nga bulan.
Gikasubo ni Ogsimer ang nahitabo nga sunog labina nga dunay kinabuhi nga nakalas.
"Ako nagahangyo ug nagpahimangno sa mga katawhan sa Lapasan nga ayaw gyud pagkumpiyansa sa mga butang nga bulohaton matag adlaw labi na maglambigit og kalayo ug kuryente nga mao man gyud ni sinugdanan sa kalayo," matud ni Ogsimer.
Gidugang pa niini nga ang kinabuhi dili na mabalik ug sakit kini palandungon ilabi na sa nahabiling pamilya.
"Dili ni parehas sa salida nga ma-rewind kung gusto nato asa nga portion kani nga actual nga panghitabo. Dili na nato pwedi ma-rewind sama ingon ani nga naay nakalas nga kinabuhi," dugang pa niya.
Nasayran nga anaa sa mga 11 ka panimalay ang nasunog diin ana sa mokabat sa P350 mil ang damyos.
Ang patay nga lawas ang kasamtangang nakahaya diha sa Lapasan covered court.