NAWAD-AN na og paglaom si Gilas Pilipinas coach Yeng Guiao nga makaduwa sa Philippine national team si National Basketball Association (NBA) Fil-Am Star Jordan Clarkson alang sa kampanya niini sa umaabot nga FIBA Basketball World Cup.
Nagkanayon si Guiao nga iyaha nang gibiyaan sa likod ang posibilidad nga makaduwa si Clarkson sa Gilas gumikan kay hangtod karon, wala gihapo’y nakitang senyales nga puwede kining mahitabo.
Ang matag upat ka mga tuig nga kompetisyon sugdan na karong Agusto 31 sa Foshan, China.
“Mukhang wala na si Jordan. It’s too late at this point,” matod ni Guiao sa interbyu sa Spin.ph.
Ang usa sa mga pambato sa Cleveland Cavaliers gilakip ni Guiao sa iyang 19-man pool sa pamasin nga matugtan kining makaduwa sa Gilas isip usa ka lokal nga magduduwa.
Naa man tuod sagol nga dugong Pinoy si Clarkson apan dili gihapon kini puwedeng makaduwa isip lokal nga magduduwa tungod kay wala kini nakakuha og Philippine passport sa wala pa kini nag-16 anyos nga maoy nakasaad sa lagda sa FIBA.
Kon moduwa man gani si Clarkson sa Gilas, kinahanglan kining mahimong usa ka naturalized player nga dili na sab puwede gumikan kay anaa na man si Andray Blatche.
Ang matag nasod tugtan ra og usa ka naturalized player.
Ang Samahang Basketbol ng Pilipinas (SBP) ninghimo na sa tanan niining makaya ug minghangyo sa FIBA aron matugtan si Clarkson nga makaduwa sa Gilas apan wala kini nakadawat og tubag.
“Fiba has not indicated any change in its original decision, so we just have to move on,” pagtino ni Guiao. (ESL)