KANHI coach sa Cleveland Cavaliers nga si Ty Lue gikuha isip top assistant coach sa Los Angeles Clippers.
Sa taho ni Shams Charania sa The Athletic, si Lue maoy himuong pangabaga ni Clippers headcoach Doc Rivers sa umaabot nga NBA season.
Dili bag-o ang panagkauban sa duha ka mga beteranong coach sa NBA sanglit nagkakuyog na usab sila niadtong tuig 2011 ngadto sa 2013 sa Bostoc Celtics ug sa 2013 ngadto sa 2014 sa Clippers.
Ubos sa Cleveland, si Lue maoy naggiya sa Cavaliers ngadto sa kampiyonato niadtong 2016 sa dihang ilang gipukan ang Golden State Warriors sa best-of-seven NBA Finals. Apan sa niaging tuig, wala na siya bag-ohi pa sa iyang kontrata sa Cavaliers.
Usa unta siya sa gilantawan nga kuhaong headcoach sa Los Angeles Lakers apan wa kini magkasinabot sa kontrata nga maoy nakapaaghat sa Lakers sa pagkuha ni Frank Vogel isip headcoach. (JBM)