PUJ, van nagbangga; 17 nangaangol

(Tampo nga hulagway)
(Tampo nga hulagway)

USA ang kritikal samtang laing 16 ka tawo ang naangol sa panagbangga sa usa ka tourist van ug PUJ sa M.L. Quezon avenue, Dakbayan sa Lapu-Lapu sayo sa buntag sa Huwebes, Agusto 22.

Walo ka mga Japanese national, nga naglakip sa upat ka mga bata, ang sakay sa van kauban ang usa ka menor de edad nga giingong anak sa driver, samtang unom usab ka mga pasahero ang sakay sa PUJ, sagad mga trabahante sa Mactan Economic Zone (MEZ).

Matod sa City Traffic Management investigator, Police Corporal Melvin Eyas, gikan sa JPark Resort sa Maribago ang van ug padulong unta sa Mactan International Airport aron paghatod sa mopauliay nga mga langyaw.

Samtang kasugat usab nga direksyon ang PUJ nga gikan sa lungsod sa Cordova padulong sa MEZ paghatod usab sa mga trabahante.

Nagkasungag ang duha ka mga sakyanan human giingong kusog ang pagpadagan sa tourist van nga giingong ni-counterflow.

Nailhan ang driver sa PUJ nga si Jefferson Opane Dayuday, 56, taga Brgy. Pajo, Dakbayan sa Lapu-Lapu samtang Albert Contratista nga mulopyo sa dakbayan sa Mandaue ang mimaneho sa tourist van.

Milihay?

Nihimakak si Contratista nga kusog ang iyang pagpadagan ug di counterflow ang iyang gibuhat, apan duna lang siyay gilihayan sa dalan.

Niangkon hinuon siya nga nagduka siya sa wa pa nagmaneho sa sakyanan.

Kasamtangang anaa karon sa pribadong tambalanan ang mga naangol ingon man ang usa nga kritikal ang kondisyon.

Angol nga mga pasahero sa PUJ mao sila si Mel Rose Reconalla, 22, taga Bang-bang Cordova; Arthur Berame, 28, taga Brgy. Babag Lapu-Lapu City; Remvie Andales, San Miguel, Cordova; Ma. Fiel Boctot, 24, San Miguel, Cordova; Ryan Cañete, 29, Pilipog, Cebu; Haze Bayog, 29, taga Bang-bang, Cordova, kinsa sakay sa PUJ.

Samtang nakaangkon usab ug minor injuries ang mga langyaw nga sila si Masayuki Igarashi, 38; Reiko Igarashi, 40; Shun Igarashi, 4; Wataru Igarashi ,4; Haruna Nakamura, 43; Kentato Nakamura,46; Yuta Nakamura, 7;ug Taichi Nakamura, 5.

Nakalarga hinuon ang upat ka mga Japanese national samtang nagpabilin pa sa tambalanan ang ilang upat ka mga kauban. (ANV)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph