MIASENSO na halos ang tanang mga igsuon ni Celine. Gihimo siyang caretaker sa dakong yuta ug sa dagkong mga balay nga nagyaka niini. Sa sinugdanan, ang hayhat niyang manghod nga babaye maoy gipiyalan kaniadto, apan mangayo kinig dugang suhol kay dako kuno ang gikinahanglan nga kunsumo sa matag adlaw, May bayranan sa tubig ug sa kuryente matag buwan. May lainlaing mga hayop nga pagalawgan. May daghang mga tanom nga atimanunon nga nagliyok sa dakong yuta nga mosangkad kapin sa upat ka libo ka metros kuwadradong yuta sa sudlunong dapit sa barangay Atabay sa Alcoy, Sugbo. Kanhi, may hardinero ug sekyu pang gisuholan matag buwan.
Apan dihang si Celine na ang mipuli nga caretaker, nawala na ang hardinero ug sekyu. Nagbinugtong siya sa tanang mga buluhaton matag adlaw. Dako na ang sapi nga iyang madawat sa iyang magulang nga babaye nga atua manimuyo ug manginabuhi sa Amerika kay nakabanag Amerkano. Pobre sila kanhi, nagpuyo sila sa balay nga gusbat. Apan karon ang mga lawak may air-con. Dekutson ang mga higdaanan. May sakyanan pang moserbisyo sa iyang mga lakaw sa gawas.
Drayber niya ang sabungero niyang maguwang nga lalake nga si Freco. Gipalayas kini sa iyang asawa sa Badian, Sugbo, kay wala kiniy yuta ug balay gawas sa kabiling yuta sa iyang asawa. Kapin sa usa ka kahang sigarilyong mahalon ang mahurot niya matag adlaw. Walay trabaho, walay kinitaan. Tungod sa sapian niyang mga igsoon, may mga anak nga napatungha niya sa kolehiyo ug unya nahinabangan og sapi sa pagpasulod og trabahao ngadto sa laing mga nasod. Bisan gipalayas sa iyang asawa, manghakot kinig mga butang sa Alcoy ug dad-on sa Badian, ug ang iyang asawa nakasaway, nagsalikway sa mga butang nga gipanghakot,
Nabuhi na si Freco sa pagsalig sa iyang mga anak, apan madudahon kini kon magpabadlong ang iyang mga anak nga nanarbaho ra sa lokalidad, ug kon dili makabadlong ang iyang asawa, isibya niya sa katawhan nga burikat ang iyang asawa ug dili niya mga anak ang mga badlungon. Ang iyang kinamanghurang anak nga babaye nga gipaangkan ug wala pakasli, nganlan usab niyag burikat. Mga bastardo ang iyang mga anak nga dili makahatag kaniyag sapi alang sa iyang mga bisyo, magasiyagit sa kasilinganan, halos giango-ango na.
Bungol na si Freco sa iyang pagka tiguwang, apan banha ang baba niini nga mohingalan sa iyang bayaw, ingon man sa mga pag-umangkon niini, nga mga kawatan sa mga manok niyang igsasabong. Ug si Freco nga nagpalaban sa iyang mga igsuong babaye, nga mga hayhat ug maot, mikunsintir ug gipabiya siya sa iyang pamilya sa Badian ug miipon kang Celine didto sa Alcoy, Sugbo. Sinilbihan siya ni Celine nga mao pay molaba sa iyang brip ug uban pa niyang underwear. Mga manok nga igsasabong mao ray iyang silbihan. .
Mga senyor sitisen na silang duha, nagpuyo silang hari ug rayna kay may sustento sila sa ilang mga igsuon. Nagpatuyang sila sa ilang mga galastohan. Si Celine mipalayas sa iyang bana nga wala nay trabaho ug tiguwang na kay hasol ug samok sa ambisyon niining moeskuyla pag doctoral degree aron makabalik og maestro. Retirado na ang iyang bana apan gamay ra kaayo ang pensiyon. Buysit ang iyang bana nga maghingaon og lakip sa iyang kinitaan nga caretaker. Daan nang way gugma siya sa iyang bana kaniadto ug nagpakasal lang siya niini kay di na siya birhen ug may sarang pang trabaho ang iyang bana kaniadto. Ug ang ilang mga anak demalason, ug gamay rag kinitaan ug nagkalisod. Anha pa niya maghangad sa pagpangayo ug pagpangutang og sapi. Buysit ang pamilya ni Celine, apan maot kining mosimba matag adlaw, molimos kunuhay sa mga kabos, ug mamusturawo siya kanunay kay imbitado sa mga kumbera sa mga tawo sa simbahan. Gitabi pa kining nanguwag og lain.
Apan usa niana ka adlaw, may balitang mikuyanap. Nadisgrasya ang sapian nilang mga igsuon nga nagpuyo sa laing mga nasod ug nangamatay. Naputol ang ilang mga sustento ug nagmasakiton sila. Ang pamilya nga ilang gisalikway maoy nagluwas kanila. (KATAPUSAN)