Sama sa ubang lalawigan nga adunay nagpangamay sa mga dapit nga kasuroyan, wa sab gyud magpauwahi ang lalawigan sa Negros sa ilang mga hiyas.
Gikan sa mga maanindot nga kabukiran ug kadagatan, daghan sab gyud nga mapasigarbo ang Negros.
Ning bag-o lang, gibisita sa Superbalita Cebu ang dakbayan sa Bais nga gibana-bana nga 45 kilometros ang gilay-on gikan sa dakbayan sa Dumaguete.
Ang Bais gidagsa di lang sa mga lokal apan lakip na sa mga langyaw nga turista tungod kay ang maong dakbayan nabantog man sa ilang dolphin watching tours.
Makalingawng Dolphins
Ang kadagatan sa maong dakbayan maoy gihimong pugaran sa mga dolphins nga sagad nimong makit-an matag buntag ilabi na kon maayo ang dagan sa panahon.
“Based on my experience, the best time to watch dolphins is during early morning but walay specific nga time kay ato pa man na sila pangitaon,” saysay ni Randy Sanguenza, tag-iya sa R&R Cruise nga nahinabi sa Superbalita Cebu.
Si Sanguenza maoy nagbinugtong nga nagtanyag og boat tour sa Bais ug mismong ang bangka niini maoy gisakyan ning tagsulat atol sa tour sayo ning buwana.
“Adunay mga panahon nga daghan kaayo sila (dolphins) ug magdula-dula, maglukso-lukso, ug magsunodsunod pa gani sa pumpboat. Apan daghan pud mi experiences nga dili pud makita dayon,” dugang ni Saguenza.
Nasuta ning mantalaan nga naglahi-lahi ang rate sa renta sa bangka alang sa whole-day dolphin watching ug pagbisita sa Manjuyod White Sandbar.
Boat Rental
Sa R&R Cruise, anaa sa P4,500 ang renta nga kasakyan og 10-15 ka tawo nga gustong mag-tour samtang P5,000 ang 16-20 person.
Dili mo magmahay nga mo-avail sa pumpboat sa R&R Cruise gawas nga nindot ang ilang mga sakayan, luwas ug aduna pay libreng wifi.
Ang pagpangita sa mga hugpong sa mga dolphins nga naglangoy-langoy sa Bais nagkinahanglan gyud og igong pasensya tungod kay di nimo sila makita diha-diha.
Sa kasinatian ning tigsuwat, nagpadagan pa among kapitan og mga 30 minutos usa namo nakit-an ang unang dolphin pods sa among tour.
Mga duha ka oras mi naglayag sa lawod aron among makauban ang mga dolphins nga nalingaw sa paglangoy-langoy.
Mga ginadili
Angay ninyong hinumduman nga atol sa tour, hugot nga ginadili ang paglangoy ug pag-dive kuyog sa mga dolphins.
“Di pud mag-feed og pagkaon sa mga dolphins. Dili sad maghimo og activities nga maka-hurt sa mga dolphins,” paambit ni Saguenza.
Unsaon pag-adto
Gikan sa South Bus Terminal mosakay lang mo og Bus paingon sa Dumgauete diin ang plete anaa sa P235.
Ang plete sa barko gikan sa Santander port paingon sa Sibulan port anaa sa P70
Gikan sa Dumaguete, inyong maabot ang Bais pinaagi sa bus o pribadong sakyanan apan mas dali ninyo maabot ang dapit kon sakay mos pribadong sakyanan kay inyo ra kining maabot wa pay usa ka oras.