Abueva naghimo og basketball clinic

SAMTANG nagpadayon pang nagserbisyo sa iyang pagka-suspenso, ang kontrobersiyal nga PBA star nga si Calvin Abueva, naghimo usab kini og mga maayong binuhatan.

Kini human migahin ang power-forward sa Phoenix Pulse og igong panahon nga matudloan ang mga bata pinaagi sa usa ka basketball clinic sa Pampanga nga gitawag og “Delta Basketball Training Camp.

Ang Camp gihingan ubos sa kasamtangang Governor sa Pampanga nga si Dennis “Delta” Pineda, kinsa mao usab ang nagpaluyo sa maong proyekto.

Si Pineda maoy manager ni Abueva sulod na sa hataas nga panahon samtang si Atty. Charlie Chua, abogado sa gobernador, maoy kasamtangan niyang agent.

Sa pagkakaron, si Abueva anaa mopuyo sa iyang pamilya sa Pampanga. Gikataho nga nagkabuwag si Abueva sa iyang asawa tungod sa grabi nilang panaglalis nga gani na publicized og maayo sa social media sa niaging buwan. (JBM)