ANG Australia maoy usa sa pinakalig-on nga team sa umaabot nga World Cup sa China.
Kini maoy obserbasyon sa beteranong coach sa San Antonio Spurs sa NBA nga si Gregg Popovich kinsa mao usab ang modala saTeam USA.
Gitumbok ni Popovich nga Australia adunay igong kapabilidad nga molangkat sa kampiyonato sigon sa iyang nakita sa mga tune up games batok sa ubang nasod nga gipahigayon sa Melbourne ning semanaha. “They are one of the teams that can win the whole thing, without a doubt,” matod ni Popovich nga napatik sa nba.com. “I’m not saying that because I’m here (in Melbourne). It’s just a fact.”
Ang Team USA, ang no. 1 squad sa Fiba rankings, modepensa sa ilang titulo sulod sa ikatulong sunodsunod nga higayon sa World Cup 2019 nga sugdan sunod buwan.
Kini bisan pa man og daghan nga mga NBA superstars ang mi-backout sa team sama nila ni James Harden, Anthony Davis ug Kawhi Leonard. Hinuon, mga batan-on nga may igong talent ang milangkob sa defending champions.
Human nila mapukan ang no. 2 team nga Spain, 90-81, sa tuneup game sa Anaheim, California, ang Team USA kagahapon miabot sa Melbourne alang sa laing tune up series.
Ilang ikasangka ang Australia Boomers karong adlawa ug dayon ang Canada karong Sabado (Dominggo sa Pilipinas) didto sa Sydney alang sa ilang katapusang warm-up.
Wa pa man tuod maka-medal ang Australia sa World Cup apan nagtuo si Popovich nga posibli mahitabo na kini karong tuiga.
“They’ve been close for several years, and they are hungry. They are talented. Coach (Andrej) Lemanis does a good job, and they are a team,” ingon niya sa USA basketball website. Mangulo sa Australia Boomers mao ang mga NBA stars nga naglakip nila ni Joe Ingles sa Utah Jazz ug Patty Mills sa San Antonio Spurs. (JBM)