Gilas masulod sa Top 16: MVP

ANG chairman emeritus sa Samahang Basketbol ng Pilipinas nga si Manny V. Pangilinan masaligon sa tsans sa Gilas Pilipinas nga makasulod sa Top 16 sa umaabot nga Fiba Basketball World Cup sa China.

Atol sa send-off ceremonies niadtong Miyerkules sa Meralco Multi-Purpose Hall sa Ortigas, si Pangilinan nagkanayon nga dili imposibli ang tinguha nga molampos sa first round batok sa Italy, Serbia ug Angola ang Gilas aron moabante sa round two nga langkuban unya sa 16 ka mga teams.

“(I’m) always optimistic,” matod sa basketball exec ug patron ug mihagit sa team nga palabwan pa niin ang ilang nahimo sa World Cup debut sa Spain, upat ka tuig ang nakalabay.

Aron kini makasulod sa sunod round, kinahanglan nga mokutlo og duha ka daog ang Gilas sa Group D. Ilang gitagna nga ang Angola maoy aduna silay dakong tsans nga makadaug ug ang Italy ang ikaduhang target.

“Take it one at a time,” pahimangno ni Pangilinan sa squad.

Sa Agusto 31, ang Gilas didto sa Foshan batok sa Italians diin gipaabot nga si Presidente Duterte mosaksi ug moabiba alang sa team sa ringside.

Sunod ang higanti ug top favorite nga Serbia sa Septiyembre 2 ug dayon ang Angola sa Septiyembre 4.

“I think if we could make it to the Final 16, that would be a huge achievement for Gilas,” dugang ni Pangilinan.

Diha usab sa send-off si SBP president Al Panlilio, executive director Sonny Barrios, PBA commissioner Willie Marcial ug mga sakop sa bisitang Australian club Adelaide 36ers.

Ang Presidente mobisita sa China gikan sa Agusto 27 ngadto sa Septiyembre 2 apan kon ang Gilas makapakaging sa Italy posibling mo-extend pa kini sa iyang pagbisita aron huwaton ang pagpakigkombati sa mga Pinoy batok sa grabi ka inilog nga Serbia.

“The fact that he’s going down to Foshan from Beijing shows his tangible support for the team and of course the Philippines. We’re grateful for that and glad that he’s coming down to show his support for the team,” pasabot ni MVP.

Ang Gilas ubos ni coach Yeng Guiao anaa na karon sa katapusang hug-ong sa ilang training sa dili pa kini mogikan paingon sa China. (JBM)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph