SA KADAGHAN sa mga problema sa syudad sa Lapu-Lapu, gikan sa naghuot nga trapiko hangtod sa pagbaha sa pipila ka mga lugar sa dakbayan, dunay usa ka problema nga klaro kaayong naglisod pagsulbad si Lapu-Lapu City Mayor Junard “Ahong” Chan.
Mao kini ang pagpapahawa sa legislative office ni Lapu-Lapu City Rep. Paz Rdaza gikan sa City Hall. Si Kongresista Paz Radaza, mayor sa maong syudad sa tulo ka termino, morag nawili sa pagbiya sa City Hall.
Di sama ni kanhi mayor Tomas Osmena sa syudad sa Sugbo. Nibiya nga wa kukawili sa iyang buhatan sa Cebu City Hall. Pero mora gihapon og nawili kay morag gidala ang tanan sa iyang opisina, gilangkat ang kisame ug gitagtang ang mga tiles sa sawog hangtod ang lababo ug inuduro.
•••
Ang gisaligan ni Radaza mao ang ordinansa nga gipasar sa konseho nga iyang alyado sa talisawop na ang iyang administrasyon nga nagtugot kaniya sa paggamit sa legislative district office sa City Hall.
Apan si Interior and Local Government Secretary Eduardo Ano, sa usa ka legal opinion, nideklarar nga inbalido ang maong ordinansa. Abi nato kon mao na kini ang katapusan sa maong isyu.
Wa pa kay wa pa man mobiya ang mga staff ni Radaza sa iyang buhatan bisan pa kon gitaptapan na kinig og plywood. Nagbutang gihapon og mga lamesa sa gawas sa iyang legislative office sa City Hall.
•••
Ang makapahimuot kay si Ahong Chan, nagbutang sab og iyang lamesa tupad sa mga lamesa ni Radaza. Morag di siya maoy mayor nga siya man unta ang hawod sa City Hall ug duna man siyay kaugalingong opisina.
Niabot ang panahon, sumala sa taho, nga ang ang atubangan sa legislative office ni Radaza gikalibangan sa iring. Di ko motuo nga si Mayor Chan maoy nagpakalibang sa iring sa maong dapit. Kay mas labi pang di motahod og mayor ang iring.
Pero panahon na hunungon ang pag-insistir ni Radaza nga mo-estar sa City Hall. Maghuwat na lang siya sa tukmang panahon nga mapili siya pagbalik nga mayor sa syudad sa Lapu-Lapu. Kon moabot ang maong panahon, wa nay iring mga maghigaw-hugaw sa iyang opisina.