KANUNAY na akong nagsunod sa iyang drama sa radyo, ‘Manok ni San Pedro’ sa DYHP matag gabii niadtong elementary ug high school pa ko sa akong yutang natawhan sa dakbayan sa Dipolog. Pipila lang ka mga radio stations dinhi sa Sugbo ang moabot ang signal didto sa Mindanao. Ang DYHP, DYDY, DYRB ug DYCB.
Wala damha sa pagtungha nako sa kolihiyo sa dakbayan sa Zamboanga ug nakasulod ako sa radyo, nag-partner kami ni Julian Daan nga na-ilang Esteban Escudero kay pareho kami og network nga gi-alagaran sa dekada 80. Nagsugod na kog trabaho sa radyo sukad sa 1980. Ako maoy on board sa DXRZ (UMBN-RMN) Zamboanga matag buntag samtang si Teban maoy onboard usab dinhi sa DYHP Cebu. Magbayloay kami og mga balita ug komedya pinaagi sa tie up sa long distance. Ang tanang drama dinhi sa DYHP gi-replay usab sa DXRZ maong suhito ko sa tanang drama niadto.
Hangtod nga nakabakasyon ako dinhi sa Sugbo ug si Teban maoy una nakong gipagkitaan sa DYHP. Pila ra may estorya, naka-desisyon ko nga manimpalad ug mobalhin dinhi sa Sugbo gikan sa Zamboanga niadtong 1987. Nakasulod ko sa DYMF Bombo Radyo Cebu.
Wala kami magkauban ni Teban og radio station apan suod kaming managhigala. Dihay mga okasyon nga nagka-kumpare kami sa pag-sponsor og kasal. Ug magkita-kita kami kon dunay mga okasyon sa taga radyo. Niadtong ako pa ang chairman sa Kapisanan ng mga Brodkaster ng Pilipinas (KBP) Cebu chapterm akong gihatan og panahon ang mga drama talents matag Broadcasters’ Month diin magkatapok ang tanang dramatorgo. Makalingaw tuod ika-uban si Pareng Teban kay mogawas ang iyang pagkasi-aw. Kon unsa siya ka siaw sa papel sa radyo nga iyang gidala, mao usab sa personal.
Gumikan sa pagka-popular, gisudlan ni Teban ang kalibutan sa pulitika. Nakaserbisyo siya isip provincial board member ug konsihal sa Talisay City. Ang iyang ngalan dili gyud mahimong hikalimtan sa iyang mga sumosunod. Karon nga mitaliwan na siya, magkakita na gyud sila ni San Pedro sa langit ang tag-iya sa manok nga maoy nakapasikat kaniya. Adios, Pareng Teban. Hangtod sa sunod natong panagkita. Mamuwang naka sa langit, Pre, uban ni San Pedro. (bobbygnalzaro@gmail.com)