NAPASAR sa konseho sa dakbayan sa Lapu-Lapu pinaagi sa mass motion ang resolusyon nga nagdeklarar sa Isla sa Olango ubos sa state of calamity atol sa regular session sa konseho kagahapon, Huwebes, Agusto 22.
Ang City Disaster Risk Reduction and Management Council (CDRRMC) una nang nideklarar og state of calamity niadtong Agusto 9, Biyernes, apan gikinahanglan gihapon kini og pag-uyon gikan sa konseho sa dakbayan.
Nipadayag unta si Konsehal Eduardo Cuizon, chairman sa Barangay Affairs, nga mangayo lang una ang konseho ug resolution sa 11 ka mga barangay sa isla sa Olango una aprobahan sa konseho ang pagpaubos sa state of calamity apan nakombinsir siya ni Konsehal Gregorio “Epoy” Paquibot Jr. sa pag-usab sa iyang baroganan sanglit klaro ug tataw sa mga balita sa media nga daghan ang apektado sa 6 ka adlaw nga pag-isa sa gale warning.
Si Konsehal Nelson Yap mihimo og motion sa pagsuspenso sa house rules aron mahatagan ug higayon ang Officer in Charge sa CDRRMC nga si Nagiel Bañacia nga makapasabot sa konseho nganong angayan nga ideklarar ang isla sa Olango sa state of calamity.
Alang ni Bañacia dili na kinahanglan ug barangay resolution aron magamit ang pundo sa Quick Response Fund sa CDRRMC sanglit pundo kini sa dakbayan ug dili sa barangay.
Kinahanglan usab ug pundo ang CDRRMC aron ipalit ug mga hinabang sanglit wala nay pundo ang City Social Welfare Office.
Nalakip na sa annual budget ang quick response fund sa CDRRMC karong tuiga.
Gawas ni Bañacia naminaw usab ug pasabot ang konseho sa opinyon sa city accountant nga si Helen Dungog kung mahimo nga makapagawas og pundo ang dakbayan bisan walay resolusyon sa mga barangay.
Dihang mipasabot si Dungog nga mahimo basta aduna lang kini resolusyon sa konseho sa dakbayan dinhi na nakombinsir ang konseho sa pagpasar sa resolusyon sa hingpit nga pagdeklarar sa isla sa Olango ubos sa state of calamity.
Tungod niini, mahimo nang makagamit ang CDRRMC sa moabot P7 milyones nga pundo aron maoy gamiton sa pagpalit og relief goods ug supply alang sa moabot 6,000 ka mga apektadong lumolupyo sa isla.
Gikatakda nga ang Dakbayan mopadala og food packs nga dunay sulod nga unom ka kilong bugas, upat ka latang sardinas, upat ka latang corned beef ug unom ka sachets sa kape alang sa mga molupyo sa Olango nga apektado.
Nunot ning naghulga nga kanunay nga dautang panahon, gibutyag ni Bañacia nga sa pagkakaron dili ra apektado ang biyahe sa isla sa Olango sanglit mga motorbanca lang ang dili palargahon sa Coast Guard matag karon ug unya ug walay labot ang roll- on-roll-off o roro vessel.
Masaligon hinuon si Bañacia nga dili ra magdugay ang kining dautang panahon itandi sayo ning buwana.
Ila na gipapaspasan sa tag-iya ug roro nga magbiyahian sa isla ug mainland sa pagpa-upgrade sa ilang gross tonnage aron sa ingon bisag adunay gale warning dili apektado ang biyahe sa isla.
Kon ugaling magdugay ang bati nga panahon, gipadayag hinuon ni Bañacia nga andam na usab silang moatiman sa ma-stranded nga mga pasahero sa mga pantalan sa dakbayan. (GCM)