DOSE dayon ka mga sakyanan ang nasampulan sa estrikto na nga pagpatuman sa clamping ordinance sa siyudad sa Talisay, bisan ang ubang sakyanan gipanag-iya sa mga kawani sa Talisay City Hall.
Alas 8:00 sa buntag kagahapon, Huwebes, Agusto 22, gisugdan sa City of Talisay Traffic Operations Development Authority (CT-TODA) ang operasyon, diin duha ka teams ang nisubay sa national highway ug South Coastal Road.
Diin hangtud sa alas 12:00 sa udto, siyam ang na-clam, tug-an ni Jonathan Tumulak, pangulo sa CT-TODA.
Hinuon, upat ang ni-settle dayon sa ilang penalties.
Sa hapon sa samang adlaw, laing tulo ka mga sakyanan ang na-clamp.
Adunay mga sakyanan nga sa daplin sa dalan gihimo na nga parking area labi na sa ang ilang panimay naa sa sudlunon pa nga dapit.
Adunay nagpa-renew sa iyang lisensya diha sa Land Transporatation Office (LTO) sa Talisay, diin sa daplin sa dan giparada ang sakyanan.
Pipila nga dunay gipalit sa unahan, diin sa sidewalk giparada ang sakyanan.
Gipasabot ni Tumulak nga adunay uban nga illegal parking ang gisyu nga citation lang human nga daling nakaduol ang drayber ug wala na nipaabot pa og minuto, gisibog na dayon ang sakyanan sa dihang gi-wangwangan sa patrol car.
“Ubay-ubay gyud tan a-claman kay gipangbiyaan, gani naa tay, usa sa mga empleyado sa gobyerno, nga iyang sakyanan, usa sa na-claman, wala man sad nireklamo, unya siya maoy nangayo og dispensa kay gipatakaan lang og bilin sa iyang anak ang sakyanan,” saysay ni Tumulak.
Pahinumdom niya labi na niadtong mag-overnight parking o 24-oras sa daplin sa dalan, bisan sa weekend, mag--roving ang mga sakop sa CT-TODA ug pagpatuman sa mga balaud sa kadalanan.
Sa laing bahin, nihimo usab og operasyon ang Land Transportation Franchising and Regulatory Baoard (LTFRB-7) batok sa kolorum nga mga sakyanan nga namasahero sa SRP, Huwebes sa buntag, Agusto 22, gikan sa Talisay padung sa syudad sa Sugbo ug vice-versa.
Usa kini ka van ug awto ang nasakmit sa LTFRB. Matod ni Tumulak nga kasagaran di moubos sa P120,000 ang penalty sa kalapasan. (FMD)