GIBUTYAG ni Misamis Oriental Provincial director Police Colonel Robert Roy Bahian nga wala pay petsa kon kanus-a buksan ang Capitol Park sa Kapitolyo Probinsyal.
Matud ni Bahian sa SunStar Superbalita nga wala pay fixed nga petsa kon kanus-a kay daghan pa ilang gikonsidera.
“I-determine sa nato ang sitwasyon ayha nato buksan ug studyohan ug maayo,” matud ni Bahian.
Unang gisulti ni Governor Yevgeny “Bambi” Emano nga gapaabot lang siya sa kamandoan ni Colonel Bahian kon kanus-a kini buksan labina nga sa panahon sa pagpapahawa sa bakwit human nagtukod og gambalay ug nakasupak sa balaod sa kanhi pamunoan pa ni Police Col. Rolando Destura ang maong direktiba ug gisulti niini nga human sa demolisyon kinahanglan ipaubos ug rehabilitasyon ang palibot sa Capitol Park sulod sa duha ka bulan.
Kahinumduman June 18, natigayon ang demolisyon ug niadtong Agusto 18 nag duha na kini ka bulan apan wala gihapon kamandoan nga mabuksan kini karong panahona.
Una sab gisulti ni Governor Emano nga posibleng buksan kini dungan sa pagbukas sa buhatan sa Provincial Tourism Department ug Pasalubong Center karon umaabot bulan sa Septiyembre.