POSIBLENG magdagan na sa sunod bulan ang mga modernong sakyanan sa dakbayan sa Cagayan de Oro.
Gibutyag ni Konsehal Teudolfo Bong Lao, tsirman sa komitiba sa public utilities sa konseho, nga posibleng mapagawas na kini sa dili madugay.
“Katong atong bag-ong buses, ma-release na to karon nga bulan or early September. Naa lang i-comply didto sa ila,” matud ni Lao.
Giingong mga anaa sa 25 ka mga modernong buses ang gitakdang ipagawas na kung makumpleto na ang mga rekisitos ilabi na ang parking area.
“(Anaa sa) 25 tong initial makita na nimo modern na pareho na sa airport sa Manila nga bus. Dili mahal ang pamasahe ang nakagwapo ana kay environment friendly, health hazard free, dili delekado sa sakit ang mga tawo,” dugang pa.
Nasayran nga ang Department of Transportation gilusad ang Public Utility Vehicle Modernization Program (PUVMP) niadtong tuig 2017 diin tumong niini nga mamahimong environmental friendly ang mga pampublikong sakyanan.
Buot niini nga mawala na ang mga karaan nga mga dyip ilabi na nga anaa na sa 15 ka tuig ug mailisdan og mga luwas, kumportable ug dili makadaot sa kinaiyahan.