GILUGOS sa ka boardmate ang usa ka estudyante samtang nakatulog niadtong Agusto 20 mga alas 2 sa hapon sa Barangay Lapasan, dakbayan sa Cagayan de Oro.
Si Nene (dili tinuod nga ngalan), 18, dunay kaipon ug senior high school mitumbok sa responsable nga mao si alyas Jun-jun, 27, ulitawo, residente sa maong dapit.
Sa pakighinabi kang Police Staff Sergeant Cherry Reyes, chief sa Women and Children Protection Desk (WCPD) sa Police Station 3 (PS3) sa Agora, giingong gikapoy ang maong babaye tungod kay dunay gihimong proyekto sa ilang tunghaan ug nakalimot kini sa pagtrangka sa pultahan sa kwarto.
Nakamatikod kini nga dunay naghilam-hilam sa iyang lawas apan susamang naalimukawan lang kini hangtod nga nakamata sa dihang giipit ang iyang mga tiil.
“Giipit iyang duha ka mga tiil sa duha pud ka tiil sa suspect. Iyang duha ka kamot gipataas sa iyang ulo, wala gitabunan iyang baba pero gihulga siya. According sa victim, naa gyud penetration nahitabo, na-consummate gyud siya,” matud ni Reyes.
Dugang ni Reyes basi sa estorya sa biktima nga nanguyab kaniya ang suspek apan wala niya gisugot tungod kay naa man siyay kaipon.
Nasayran nga human sa maong insidente, nagkatawa pa ang suspek ug nisibat sa wala na matuking direksiyon ug hangtod karong mga panahona padayon pa nga gipangita sa kapulisan.
Gipasakaan na usab kini og kasong rape ilabi na nga pursigedo ang biktima sa pagpanumbong niining suspek.