GIKATAKDANG mopahigayon og halapad nga clearing operation ang Kagamhanan sa Dakbayan sa Lapu-Lapu sa mga sidewalk sa tibuok dakbayan sunod semana.
Kini aron malimpyo ang sidewalk sa tanang mga estraktura, manindahay ug uban pang obstruction ug magamit na kini sa mga pedestrian.
Karong adlawa, Agusto 23, padad-an ni Lapu-Lapu City Mayor Junard “Ahong” Chan og notisya ang mga manindahay ug uban pang anaa sa mga sidewalk sa dakbayan sa paghiklin na lang o pagguba sa mga estraktura nga naka ali sa sidewalk duha ka adlaw human madawat ang notisya sa mayor.
Towing sab
Gawas sa mga estraktura ug manindahay, apilon sa paghawan sa kagamhanan mao ang ilegal nga mo-park sa kadalanan sa dakbayan.
Giandam na ni Chan ang mga tow truck sa Dakbayan aron sa pagbira unya sa mga sakyanang mo park sa sidewalk.
Duha ka teams nga langkoban sa kapulisan ug City Traffic Management System (CTMS) ang mopahigayon sa clearing operation.
Ang Team A gikatakdang mopahigayon og clearing sa Brgy Poblacion, Pajo, Pusok, Ibo, Mactan, Buaya, Punta Engaño ug Maribago.
Samtang ang Team B mao ang Gun-ob, Basak, Marigondon, Looc, Canjulao, Kalawisan ug Babag.
Ang katong mga namatyan o diha magtulda daplin sa dalan alang sa ilang pagbilar di usab pasayluon sa Kagamhanan sa Dakbayan sanglit makamugna usab kini og kahuot sa dagan sa trapiko.
Tugotan sila nga makapahimutang og tulda ug makabilar panahon sa kagabhion apan sa adlawan di kini pwedi, matod ni Chan.
Aduna usay gitagana nga adlaw kon hangtod kanus-a mahimong makabilar daplin sa dalan sanglit di usab makiangayon kon magdugay kini sa kadalanan.
Una nang gihawanan sa Siyudad ang mga sidewalk sa merkado publiko aron masigurong magamit kini sa katawhan.
“Ato silang gi-allow to put warning device sa layo pa aron makahibawo ang mga sakyanan (kaning mga haya). Pero dili pud pwedi nga 24-7 naa ang maong tent,” pasabot ni Chan.
Pangitaan pa og luna sa Kagamhanan sa Dakbayan ang mga posibleng maapektuhan sa halapad nga clearing operation aron usab di sila makulban og kaldero.
Plano karon ni Chan sa pagpahimutang nila sa dakong luna atubangan sa Hoops Dome sa Brgy. Gun-ob, diin buhaton kini nga sama sa Sugbo Mercado sa dakbayan sa Sugbo.